Os deputados do BNG, Ramón Fernández Alfonzo e Xosé Luis Rivas Cruz, rexistraron unha iniciativa no Parlamento Galego ao respecto da difícil situación que se está a vivir nunha finca do concello de Mugardos, motivada polo abandono constantes de varios animais na zona.
TRAGSA como principal responsable da súa manutención
A iniciativa prodúcese logo de que diversos particulares e entidades -como a principal asociación reivindicadora INDICAN- denunciase o abandono das res por parte do seu propietario no respecto aos coidados mínimos esixíbeis e tamén á manutención. Esta deixadez que leva sendo unha constante dende moitos anos provocou que varios membros da asociación tiveran que facerse cargo durante sucesivos días dos animais, o que conlevou á morte última dun touro na localidade mugardesa.
Logo de reiteradas denuncias -tramitadas perante o Concello, Garda Civil e Xunta- a empresa TRAGSA asumiría en teoría a manutención, hidratación e custodia dos animais, polo que INDICAN xa se desvinculaba do seu coidado. Porén, esa axuda nunca chegou nas condicións que o tiña que facer, provocando o falecemento deste último touro.
“A custodia encomentada pola Xunta á empresa TRAGSA non está a ser efectiva e, lonxe de correxirse, agrávase, como demostra o falecemento dun dos animais hai días ou mesmo a desaparición doutras reses, das que descoñecemos destino”, exclamaba o deputado Ramón Fernández.
Desvinculación total da Xunta
Ao respecto da actuación da Xunta, Fernández expresou a súa sorpresa e preocupación “pola resposta que hai uns días trasladou a Xunta aos medios de comunicación, minimizando dun xeito realmente insólito a situación dos animais, evidenciando que ou ben descoñece a realidade ou, simplemente, que trata de ocultala”.
Refírese o deputado do BNG a que a Consellaría do Medio Rural afirmase hai agora unha semana que non existe risco algún para os animais e que,logo do informe elaborado pola empresa TRAGSA, seica deciden nen abrir expediente nen incautar as reses. “Afirmar iso, cando existen probas gráficas do deterioro dos animais, da falla de alimentación e coidados mínimos; e logo de que morrera unha das reses, é unha auténtica temeridade”, finalizaba o deputado.