O Centro Municipal de Emprego retomará o luns 10 de agosto a súa formación presencial, suspendida dende marzo debido á situación sanitaria. Así, os cen beneficiarios do Programa Integrado de Emprego 2019-2020 regresarán ás instalacións logo dun período de traballo a distancia.
Dende o inicio do estado de alarma, estas persoas estiveron recibindo formación non presencial sobre cuestións como mobilidade laboral e mercado de traballo, análise DAFO e CAME, fomento da capacidade emprendedora, igualdade e corresponsabilidade, videofórum, técnicas de coaching e intelixencia emocional, entrevista laboral e prospección laboral. Os cursos que comezarán o luns serán, por unha parte, para a obtención de certificados de profesionalidade, e por outra, de formación transversal.
No primeiro caso trátase do de Atención sociosanitaria a persoas dependentes en institucións sociais -cun número total de 450 horas, das que 80 se cubren con prácticas en empresas-, e do de Operacións auxiliares de servizos administrativos e xerais -430 horas, das cales 40 son de prácticas en empresas-.
No referido á formación transversal, haberá seis cursos de Informática para a busca de emprego -25 horas por curso, para un total de 150- e outros tantos de Habilidades sociolaborais -20 horas, con un total de 120-. Para setembro está previsto o inicio da formación nas áreas de Xestión de almacén-reposición, Manipulación de produtos alimentarios: preparación e elaboración de produtos cárnicos, Camareiro de pisos e limpeza de establecementos, Dependente de comercio, Inglés sectorial adaptado aos distintos profesionais.
