O Concello de Ferrol distribuíu dende o pasado martes 17.525 equipos de protección individual (EPI) establecendo como prioridade o persoal que está a combater en primeira liña a epidemia de COVID-19. Voluntarias e voluntarios de Protección Civil, coordinados dende a área municipal de Seguridade, encargáronse a partir do luns de recoller o material que empresas, entidades e mesmo particulares anónomos lle cederon ao Concello.
No centro loxístico establecido no antigo Hospicio iniciouse unha labor de inventario de todos os EPI que chegaban e en menos de 24 horas comezáronse a enviar furgóns, primeiro ao Complexo Hospitalario Universitario de Ferrol (CHUF), ao Centro de Antención a Persoas con Discapacidade Física (CAMF) e ao albergue Pardo de Atín, en Caranza. A partir do mércores houbo suficientes unidades a disposición para comezar o reparto entre residencias de maiores, entidades benéficas, persoal de atención no fogar e corpos de seguridade. Esta distribución non se limitou ao termo municipal de Ferrol, senón que o Concello tamén prestou axuda en Fene, Cedeira e Pontedeume, desde onde lle trasladaron ao alcalde necesidades urxentes.
Ángel Mato en persoa púxose en contacto a partir da pasada fin de semana coa Confederación de Empresarios de Ferrolterra, Eume e Ortegal (Cofer), Navantia e outras empresas para solicitarlles a súa axuda á hora de conseguir os equipos, un chamamento ao que atenderon “de forma moi xenerosa”, asegurou o rexedor.
Pese á gran cantidade de equipos de protección que xa están en mans do persoal que máis o necesita, o alcalde insistiu hoxe en que todos os que se poidan reunir son poucos, e lembrou que os máis necesarios son as batas e monos cirurxicos desbotables, as máscaras cirúrxicas, as máscaras FFP2 e FFP3, os guantes de nitrilo desbotables, o xel hidroalcohólico e as gafas de protección pechadas polos laterais. O centro loxístico atópase xa practicamente vacío, pero seguen habilitadas as canles para ceder material deste tipo: a dirección de correo electrónico [email protected] e o número de teléfono 981 944 000.
Mato avanzou tamén que enviará unha carta persoal a cada empresa, entidade e particular que cederon material para expresarlles o agradecemento do Concello, da cidadanía de Ferrol e do persoal que se beneficiará do seu xesto. Nela detallaralles o destino dos EPI que tan xenerosamente cederon para que teñan un coñecemento pormenorizado de en que se empregaron as súas contribucións.
O rexedor quixo mostrar o seu recoñecemento a Cofer, polo chamamento que fixo entre os seus asociados, especialmente entre auxiliares do naval, a Navantia, a Indasa, a Disnainga, a Windar Renovables, a Gabadi, a Diresa, a Masol Iberia Biofuel, a Industrial de Acabados, a Suymo, a Pack y Seals, á Sociedade Galega de Historia Natural, a Dental Gándara Ferrol, á Droguería Boomerang, á Clínica Dental Castro Ferreiro, á Clínica Podolóxica Xiana, á Peluquería Three, a Pedro Barreiro, aos empregados do Supermercado Froiz da Gándara e a cidadáns que quixeron doar material de forma anónima.
