Enriquecer a experiencia de visita ao Museo da Construción Naval é o obxectivo co que a Fundación Exponav colgou na súa páxina web dúas “guiaventuras” unha para adultos e outra para nenos, coas que acompañar o percorrido polo edificio de Herrerías realizando á vez unha “gymkana” chea de pistas. Accédese desde o teléfono móbil e non é necesario descargar ningunha aplicación.
No caso dos pequenos estes terán a posibilidade de seguir un itinerario “pirata” e responder a unha serie de preguntas relacionadas con diferentes pezas do museo para, unha vez completado o percorrido, reclamar o seu parte do tesouro. En cada parada, a guía virtual empregada desde o móbil explica con linguaxe sinxela o que o visitante está a ver.
En canto aos adultos, como no caso anterior, a “guiaventura” recolle descricións das pezas do museo -aínda que máis detalladas- e se se responde correctamente á pregunta formulada en cada peza, avánzase ata a seguinte. Os estaleiros, o pecio da fragata Magdalena, a sala de gálibos, o remachado ou a función dos pozos de auga doce que se atopan no edificio de Herrerías son algunhas das cuestións sobre as que tratan as preguntas. Para acceder ás guías hai que picar dentro da web exponav. org as pestanas “O museo” – “Que ver” – “Visita virtual ao museo” ( https://www.guiaventuras.com/choose- adventure. php? country= espana& region=a%20 coruna& city= ferrol). O tempo estimado de duración de cada “gymkana” é dunha hora.
Por outra banda, tamén está dispoñible xa na web o material didáctico do taller infantil “Exponav en casa. Verán 2020”, unha actividade en liña para substituír ás que habitualmente se realizaban na época de vacacións de maneira presencial e das que foi necesario prescindir pola Covid-19. Neste caso, os pequenos da casa poderán aprender sobre o mar e a navegación ao mesmo tempo que dan renda solta á súa creatividade. Debuxar un mapa do tesouro e colorear animais mariños e barcos piratas son algunhas das actividades propostas que, ademais, axudan a aprender como se denominan en inglés algúns habitantes dos océanos e as partes dun buque. Para descargar o material hai que entrar en exponav. org e picar en “As nosas actividades” – “Os nosos talleres”- “Exponav en casa” (https://www.exponav.org/info/talleres/).