Nestes días de aplausos constantes, os e as profesionais facultativas da Unidade de Coidados Intensivos do Complexo Hospitalario Universitario de Ferrol quixeron sumarse ó aplauso organizado pola Sociedad Española de Medicina Intensiva, Crítica y Unidades Coronarias a nivel nacional. Esta Sociedade convocou ás 12:00 deste mañá a unha homenaxe colectiva a todo o persoal que estes días desenvolveu o seu labor en unidades de coidados intensivos e críticos.
A responsable da Unidade de Coidados Intensivos do Complexo Hospitalario Universitario de Ferrol, Isabel Álvarez Diéguez, subliñaba que era unha “homenaxe moi merecida”. Hoxe non estaban todos na Unidade, pero quixo destacar igualmente que era para todos e todas os que directa e indirectamente teñen colaborado deste ámbito.
“Nestes tempos difíciles que nos tocou vivir a todos, especialmente nun Servizo como o noso, os médicos desta Unidade queremos sumarnos a este aplauso que hoxe está dedicado especialmente ó noso persoal, todo, limpadores, celadores, auxiliares, enfermeiras e administrativas”, explicou esta mañá. “Agradecemos o voso encomiable traballo e a vosa entrega incondicional ós enfermos. Sodes un exemplo para todos nós. Grazas, e vai por vós ó noso aplauso máis sonoro”, rematou.
