O Concello de Ferrol anunciou está mañá do xoves 3 de agosto que vén de rematar un protocolo de actuación xunto coa empresa adxudicataria do servizo de comedor dos CEIP de cara ao inicio do próximo curso. O novo protocolo garante medidas para que se leve a cabo coas maiores garantías de seguridade, como é o reforzo do persoal nos comedores.
Maior número de monitores, mesmo prezo
Deste modo e tal e como anunciou o alcalde, Ángel Mato, para o curso escolar que vai comezar vaise incrementar o número de monitores nos comedores escolares para garantir que al menos dous responsables atenden o servizo de xantar e almorzo á marxe do número de comensais inscritos.
A partir de aí incrementarase o persoal en función do volume de alumnos usuarios do comedor, pero dito aumento non repercutirá no gasto das familias e manteranse os prezos do curso 2019-2020. Será o Concello de Ferrol quen asuma os custos restantes, posto que na actual situación moitas familiase están atravesando un difícil momento.
Traballo conxunto coas direccións dos centros
O Concello vén traballando coas direccións dos CEIP desde hai dous meses a través de cuestionarios individuais sobre necesidades e intereses así como dos espazos que cada centro posúe para servir os almorzos e xantares ademais dos propios comedores, co obxecto de contar con espazos e distancias suficientes para prestar os servizos. A partir destes datos, a concellería de Educación levou a cabo varias vídeo-reunións técnicas coas direccións dos centros e coa empresa responsable do servizo de comedores.
Limpeza e desinfección dos comedores
Os usuarios dos comedores escolares poderán prescindir da máscara de uso obrigatorio exclusivamente no momento da inxesta dos alimentos. Unha vez finalizado o tempo previsto para almorzar ou comer, volverán poñela de novo. Este uso tamén será obrigatorio se algún usuario ten que levantarse do seu sitio asignado.
Pola súa banda, o persoal encargado do servizo non poderá retirarse en ningún momento a máscara de uso obrigatorio, e será dito persoal o encargado de limpar e desinfectar as instalacións empregadas para xantar e almorzar utilizando produtos adecuados e proporcionados pola consellería de Sanidade.
Unha vez rematado o tempo da comida, non se contempla a realización de actividades grupais e poderase contemplar o uso de instalacións ao aire libre sempre baixo as indicacións de cada centro educativo e respectando os mesmos espazos dos que os usuarios fan uso durante o horario escolar.
Prazo aberto para inscribirse
Xa está aberto o prazo para que as familias soliciten praza para os seus fillos, tanto para xantar como para o almorzo. Ata as 23.59 horas do día 4 de setembro poderán presentar as súas inscricións directamente á empresa responsable do servizo a través do correo electrónico [email protected]. O teléfono de atención ás familias é 630 363 844.
