O veterano dramaturgo, actor e narrador Quico Cadaval será o encargado de inaugurar este venres 25 de setembro o ciclo «Únic@s». Con esta iniciativa, o Concello de Valdoviño converte ao monólogo en protagonista da súa oferta cultural nas portas da fin de semana.
«Cadaval conta… vacas, guerras, curas e cregos»
A primeira entrega do programa teatral, fixada para as 20.30 horas, permitirá aos veciños e veciñas gozar no auditorio da Casa da Cultura do espectáculo «Cadaval conta… vacas, guerras, curas e cregos». Nel, ao fío da historia de Xuán o Fino, un antepasado ao que pinta como un home bo e anodino, o narrador debulla toda unha serie de peripecias protagonizadas por persoas «menos virtuosas» que rodean ao seu devanceiro.
Trátase dunha fábula coral, estreada o pasado ano con motivo da celebración do 15 aniversario de Excéntricas Producións, coa que Quico Cadaval demostra, unha vez máis, o seu talento como contador de historias ao longo de tres décadas.
Dispoñibilidade das entradas
Desde a Concellería de Cultura sinalan que que ata este venres, en horario de 11.00 a 14.00 horas, poderán retirarse a Casa da Cultura as invitacións -un máximo de dúas por persoa- para asistir á función. Insisten ademais en que o aforo para o espectáculo será limitado e que, de acordo co protocolo de prevención da Covid-19, durante a obra haberá que permanecer coa máscara posta.
«Únic@s», impulsado polo Concello, enmárcase no programa Cultura no Camiño +, que financian Gadis e a Xunta de Galicia para enriquecer a oferta de actividades dos concellos polos que pasan o Camiño de Santiago e outros itinerarios complementarios como o Camiño de San Andrés de Teixido. O ciclo terá continuidade os seguintes venres, cos monólogos de Xan Veiga e Jorge Baleo.
