A área recreativa do pantalán das Forcadas será este sábado escenario privilexiado do concerto de Blues do País. Inaugura así o Concello de Valdoviño a programación cultural do mes de agosto, cunha actuación que dará comezo ás 20 horas e para a que é preciso retirar invitación na Oficina Municipal de Turismo martes e mércores de 11.00 a 17.00 horas e xoves de 11.00 a 14.00 horas. A función inclúese na Rede Cultural da Deputación Provincial da Coruña. Así mesmo, dende o Concello lémbrase a obrigación do uso da mascarilla.
Blues do País é un grupo formado por Bieitta James e Pepe King que interpreta música blues. A súa reinterpretación de clásicos como Sitting on the dock of the bay (Sentadiña no pantalán), I just want to make love to you (Mirarche o cu), Killing me softly (Mátasme amodo) ou Mercedes Benz (Chimpín) non deixa a ninguén indiferente. Eles amosan que é posible facer blues no idioma do país. Extraer o soul dos cultivos de millo, como se fixo en tempos pasados nos campos de algodón no outro lado do charco.
