Valdoviño comeza a prepararse para un dos acontecementos astronómicos máis agardados das próximas décadas. O Concello organiza este venres, 19 de xuño, a charla “A eclipse en Valdoviño”, impartida polo divulgador astronómico Paulino Gasalla, para achegar á veciñanza información práctica sobre a eclipse total de Sol que poderá verse o 12 de agosto de 2026.
A sesión terá lugar ás 19.30 horas no auditorio da Casa da Cultura. A entrada será gratuíta e libre ata completar aforo.
Un fenómeno histórico
Segundo os datos do Instituto Xeográfico Nacional, a eclipse comezará en Valdoviño ás 19.40 horas, alcanzará o seu máximo ás 20.28 horas e rematará ás 21.16 horas. Trátase da primeira eclipse total de Sol visible desde a Península Ibérica en máis dun século, e Valdoviño figura entre os concellos galegos nos que poderá observarse a totalidade do fenómeno.
O primeiro punto de Galicia no que a totalidade será visible será o Cabo de Estaca de Bares, en Mañón, aínda que numerosos lugares da costa de Ferrolterra ofrecerán tamén boas condicións de observación se a meteoroloxía acompaña.
Por unha observación segura
Durante a charla, Gasalla explicará as características da eclipse, resolverá dúbidas sobre os mellores lugares e horarios para seguila e insistirá na importancia de empregar métodos homologados para mirar ao Sol, evitando prácticas que poidan provocar danos na vista.
O astrónomo regresa así a Valdoviño despois de participar o pasado verán nun percorrido nocturno por Vilarrube dedicado ás estrelas e ás constelacións. Nesta ocasión, o protagonismo recaerá nun fenómeno que converterá a costa galega nun dos mellores escenarios de Europa para seguir a eclipse do 12 de agosto de 2026.
