O Concello de Valdoviño conta este ano con preto de 2.700 prazas de estacionamento para dar servizo aos usuarios e usuarias das súas praias principais. Desa cifra total, unhas 750 estarán reservadas para uso das persoas empadroadas no Concello e tamén traballadoras e traballadores ligados ao mar e aos areais, tal que mariscadoras, percebeiros ou persoal dos establecementos de hostalería situados a pé de praia. Na práctica, estes últimos poderán estacionar nesas zonas ou nas de uso libre. Esa reserva de aparcamento entrará en vigor a próxima semana e, dende onte, poderanse retirar as tarxetas identificativas na Oficina Municipal de Turismo sita na Porta do Sol.
Dende o Concello lémbrase que en Valdoviño non está restrinxido o acceso ás praias e que ante a necesidade de adoptar medidas de prevención pola COVID-19 decidiuse controlar o aforo dos areais a través da regulación do estacionamento. En todo caso, para acceder ás praias tamén existen alternativas a aparcar a escasos metros delas como desprazarse en transporte público ou deixar o vehículo en zonas próximas e realizar o último treito a pé. Así mesmo, e para facilitar o acceso de persoas con mobilidade reducida, delimitáronse prazas reservadas en todos os areais e permitirase acceder ata a zona máis próxima do areal para trasladar á persoa afectada por eses problemas de mobilidade.
Por praias, na Frouxeira hai actualmente unhas 900 prazas de estacionamento, das que 250 estarán reservadas a persoas empadroadas e traballadoros sinalados. En Outeiro -Lago-, hai unhas 90 prazas, das que 50 estarán reservadas. Respecto a esta zona, sinalar que o Concello xestionou coa Demarcación de Costas e a Xunta a posibilidade de incorporar novos espazos, aínda que está á espera dunha resposta.
Tamén con propietarios privados e vén de lograr a cesión temporal dunha parcela duns 2.000 metros cadrados a 500 metros do areal. Hoxe, iniciou a súa limpeza e, nas próximas xornadas, procederase ao seu acondicionamento. Na Mourillá -Meirás-, hai 150 prazas, reservadas para o colectivo de traballadores do mar e habilitáronse xunto ao campo de fútbol outras 300 de uso libre. Na zona de Fontesín hai 110 prazas, das que 40 estarán reservadas para empadroaos.
En Pantín, das 500 prazas, 100 estarán reservadas para empadroados e, no Baleo, as 200 prazas dispoñibles repartiranse ao 500% entre zona de empadroados e de acceso libre. E en Vilarrube, das 150 prazas, un centenar estará reservado para empadroados e mariscadoras.
