A tradición ancestral da Rapa das Bestas dará un novo salto internacional coa chegada a Texas dun proxecto audiovisual creado polo director lucense Brais Revaldería. A súa proposta, Fillos do Vento: A Rapa, levará até o público estadounidense unha visión sensorial e contemporánea da histórica celebración de Sabucedo, no concello da Estrada (Pontevedra).
A estrea norteamericana terá lugar no festival SXSW 2026, que se celebra en Austin, tras un percorrido previo por citas de prestixio internacional como Cannes e Sevilla. A obra foi seleccionada na sección oficial XR Experience Spotlight e poderá verse entre o 15 e o 17 de marzo no Fairmont Hotel, un dos espazos centrais do evento.
Este novo fito consolida a proxección exterior dun traballo que xa destacou no Festival de Cannes, onde foi un dos proxectos recoñecidos na súa categoría, e que máis tarde se presentou no Festival de Cinema Europeo de Sevilla.
O proxecto é froito de sete anos de gravacións continuadas nas montañas de Sabucedo, documentando unha tradición con máis de cinco séculos de historia. Revaldería, galardoado con dous premios Emmy polo seu traballo con HBO en series como Westworld e Game of Thrones, aposta aquí por un rexistro fiel e sen artificios dunha das festas máis singulares de Europa.
Lonxe dun formato cinematográfico convencional, Fillos do Vento: A Rapa preséntase como unha experiencia inmersiva de gran impacto visual e sonoro: proxeccións panorámicas de 270 graos, imaxe en 8K, son espacializado e mesmo estímulos olfactivos que recrean a contorna natural galega. Todo o material procede de gravacións reais, sen recreacións nin efectos dixitais.
A peza sitúa ao espectador no centro da acción, desde a baixada dos cabalos do monte até o curro, ofrecendo ao tempo unha reflexión actual sobre identidade, territorio e transformacións do mundo rural, nun contexto marcado por novos debates arredor da paisaxe tradicional.
O proxecto conta coa codirección artística de María Fernanda Ordoñez Morla e coa produción executiva de Pedro Revaldería, desde Evernia Media. A produción corre a cargo de Cinexin Studios, cun equipo internacional, e conta co apoio de institucións galegas e españolas, así como coa vinculación de 100 Sutton Studios, firma especializada en narrativa inmersiva con sede en Nova York e Galicia.
