O porto da Guarda despediu este domingo unha nova edición de A Rosegha, o festival organizado pola Asociación Piueiro que durante toda a fin de semana converteu a vila nun punto de encontro para a cultura mariñeira e a recuperación da memoria ligada ao mar.
O momento máis simbólico da xornada de clausura chegou co izado das gamelas, unha imaxe que devolveu ao porto o espírito dos antigos gameleiros e que reuniu a centos de persoas arredor destas tradicionais embarcacións. A música do Grupo de Gaitas do Clube de Xubilados e Pensionistas acompañou unha escena que resumiu o obxectivo da cita: manter vivo o patrimonio marítimo da Guarda.
A última xornada do festival completouse coas últimas quendas de navegación, así como cos obradoiros de arxila e návoas, que volveron reunir a numerosos nenos e nenas interesados en achegarse ao mundo do mar desde a creatividade. Durante dous días, pequenos e maiores compartiron espazo, coas novas xeracións dando os seus primeiros pasos na construción de embarcacións mentres os modelistas amosaban o resultado de anos de dedicación.
Un festival que mira ao pasado para construír futuro
Un dos momentos máis especiais desta terceira edición viviuse na madrugada do sábado ao domingo coa navegación nocturna das maquetas, unha actividade xa convertida nun dos sinais de identidade de A Rosegha. Co porto en silencio e as pequenas embarcacións iluminando a auga pasada a medianoite, o público puido gozar dunha estampa diferente e moi ligada á tradición mariñeira.
A programación rematou coa entrega de premios aos participantes no concurso de modelismo, que recoñeceu o traballo realizado nas diferentes categorías, desde embarcacións de guerra ata barcos de vela tradicional, pesca e manobra.
Desde a Asociación Piueiro valoraron o resultado dunha edición que consolida o festival como unha cita de referencia para poñer en valor o patrimonio marítimo. O colectivo destacou a participación da veciñanza, o labor do voluntariado e o apoio do Concello da Guarda e da Deputación de Pontevedra como elementos fundamentais para facer posible o crecemento da iniciativa.
Co remate das actividades, o porto recupera a súa actividade habitual, pero A Rosegha queda xa como unha cita asentada no calendario. As maquetas regresan aos talleres e as gamelas ao seu descanso, á espera dunha nova edición prevista para o verán de 2027.