A polémica da PAU en Galicia continúa xerando reaccións tras os erros detectados en varios exames e as sucesivas modificacións nos criterios de corrección anunciadas pola CIUG. O conflito, que comezou polas reclamacións de estudantes e profesores, acabou derivando tamén nun choque institucional entre a Xunta e as universidades galegas.
As incidencias concentráronse especialmente nas probas de Historia de España e Debuxo Técnico, onde alumnado e docentes denunciaron ambigüidades, problemas de formulación e falta de claridade nos criterios de avaliación. Tras varios días de críticas, a CIUG acabou rectificando ambos exames para evitar prexuízos ao alumnado.
Modificacións nas correccións dos exames
No caso de Historia, a comisión aclarou que ningún estudante sería penalizado pola redacción da pregunta máis cuestionada da proba. Ademais, concretouse que os alumnos poderán optar á máxima cualificación aínda que non realizasen expresamente a comparación entre socialismo e anarquismo, sempre que o contido da resposta estivese correctamente desenvolvido.
Tamén houbo cambios importantes en Debuxo Técnico. No apartado 2.1, a CIUG confirmou que o alumnado poderá conseguir unha parte relevante da puntuación mesmo sen completar correctamente todo o exercicio. No exercicio 3.1, onde a puntuación quedou dividida en tres bloques diferentes tras detectarse problemas no plantexamento inicial. A representación da proxección horizontal — directamente relacionada co erro detectado— pasará a valer 0,50 puntos sobre os 2,25 totais. Pola súa parte, a obtención da intersección entre os triángulos contará 1,25 puntos e a identificación correcta das partes ocultas sumará outros 0,50 puntos.
Xunta e universidades cruzan críticas
A postura das universidades chocou coa da Xunta de Galicia, que elevou o ton contra a organización da PAU e chegou a falar dun “cúmulo de erros” durante o proceso. O Goberno galego pediu explicacións públicas e reclamou unha revisión máis exhaustiva dos exames para evitar situacións semellantes en futuras convocatorias.
Dende as universidades insistiron en que as incidencias detectadas foron puntuais e destacaron que a rápida modificación dos criterios busca precisamente garantir a igualdade entre estudantes e impedir que ningún alumno resulte prexudicado.
As últimas decisións da CIUG tentan agora pechar unha das edicións máis tensas da PAU en Galicia nos últimos anos, marcada polas rectificacións, o malestar do alumnado e o enfrontamento entre administracións educativas.
