A Costa da Morte suma unha nova ferramenta de promoción turística e cultural coa chegada de Costa da Morte Runner, un videoxogo gratuíto que propón descubrir a comarca a través dunha experiencia interactiva inspirada nos clásicos arcade e no pixel art. A iniciativa foi impulsada pola Asociación de Profesionais do Turismo da Costa da Morte (APTCM) e desenvolvida polo informático vimiancés Martín Caamaño.
A presentación oficial do xogo celebrouse no Fórum de Carballo coa participación de representantes institucionais, membros do APTCM e responsables do desenvolvemento do proxecto. O proxecto busca achegar o patrimonio e as lendas da cultura da zona a un público de todas as idades mediante unha fórmula diferente á promoción turística tradicional.
As características do xogo
No xogo, os usuarios percorren diferentes localidades da Costa da Morte mentres superan retos. O protagonista é Eustaquio, unha personaxe que emprende unha viaxe chea de obstáculos e desafíos. Ao longo da aventura aparecen referencias a espazos emblemáticos, tradicións populares, acontecementos históricos e lendas moi coñecidas da comarca.
Os escenarios están inspirados en lugares reais, o xogo incorpora referencias a figuras de lendarias, naufraxios históricos, elementos da cultura mariñeira e costumes populares. Tamén introduce mensaxes relacionadas coa conservación do medio ambiente, invitando aos xogadores a participar en accións simbólicas de coidado da contorna durante a partida.
Ocio dixital para descubrir a Costa da Morte
O videoxogo funciona directamente dende o navegador, sen necesidade de instalación, e está adaptado para móbiles, tabletas e ordenadores. Desta forma, calquera persoa pode acceder á experiencia de maneira sinxela e gratuíta dende a web oficial do proxecto.
Costa da Morte dá un paso máis na exploración de novas fórmulas de divulgación turística, demostrando que a tecnoloxía, o entretemento e a cultura poden unirse para contar a historia dun territorio dunha maneira atractiva e moderna.
