O conflito entre o sector do taxi e os vehículos de transporte con condutor (VTC) continúa intensificándose en Galicia, con Vigo como un dos principais focos de tensión. Os profesionais do taxi levan meses alertando da presunta prestación de servizos urbanos por parte de vehículos autorizados unicamente para realizar traxectos interurbanos, unha práctica que consideran contraria á normativa vixente e que denuncian como competencia desleal.
Neste contexto, o presidente da Unión de Taxistas Galegos (UTAGA), Emilio Mosquera Rodríguez, volveu reclamar unha maior actuación das administracións públicas. O representante do colectivo sostén que estes operadores carecen de autorización para realizar desprazamentos dentro dun mesmo municipio e advirte de que a falta de control, unida ao uso das tarifas dinámicas, está a xerar un escenario de desigualdade fronte a un sector sometido a unha estrita regulación administrativa.
UTAGA cuestiona a legalidade dos servizos
Segundo explica Mosquera, as autorizacións das que dispoñen estes operadores permítenlles realizar desprazamentos entre municipios, pero non prestar servizos integramente urbanos. O presidente de UTAGA sostén que, a día de hoxe, os concellos galegos carecen dunha ordenanza que regule este tipo de actividade, polo que estes servizos estarían desenvolvéndose fóra do marco legal.
Desde a organización lembran que o taxi desenvolve a súa actividade baixo unha regulación estrita, con tarifas oficiais, controis do taxímetro, requisitos de capacitación profesional e condicións administrativas específicas, polo que consideran que todos os operadores deberían competir baixo as mesmas regras.
A tarifa dinámica, outro dos focos do conflicto
Ademais da cuestión das autorizacións, UTAGA pon o foco no sistema de tarifa dinámica, empregado por algunhas plataformas e que permite modificar o prezo do servizo en función da demanda. O colectivo considera que este modelo xera unha diferenza significativa respecto ao taxi, cuxos prezos están regulados pola Administración e ofrecen, ao seu xuízo, maior transparencia para o usuario.
Mosquera recoñece que corresponde a cada cidadán elixir o medio de transporte que desexa utilizar, pero insiste en que «esa decisión debe producirse nun mercado onde todos os operadores cumpran as mesmas obrigas legais».
Un conflicto aberto en Galicia
As declaracións de UTAGA enmárcanse nun conflito que se recruou especialmente en Vigo, onde o sector do taxi respaldou as actuacións do Concello de Vigo contra vehículos que presuntamente realizaban servizos urbanos sen autorización e reclamou un maior apoio institucional. En paralelo, as empresas de VTC manteñen aberta a vía xudicial para defender o seu modelo de negocio, mentres o debate sobre a regulación do transporte urbano continúa sen unha solución definitiva.
Desde a organización agradecen a actuación do Concello de Vigo pola apertura de expedientes sancionadores e a inmobilización de vehículos que, segundo afirman, estaban a operar de forma irregular. Para UTAGA, o debate non debe centrarse na convivencia entre distintos modelos de mobilidade, senón en garantir o cumprimento da legalidade vixente e unhas condicións de competencia equitativas para todo o sector.