O consumo de alcohol continúa a mudar en Galicia e no conxunto de España. Os datos máis recentes do Ministerio de Sanidade mostran unha tendencia á redución do consumo habitual, ao tempo que aumenta o número de persoas que optan por non beber. A transformación é especialmente visible entre a mocidade, onde os hábitos relacionados co alcohol experimentaron unha forte caída nas últimas dúas décadas.
En Galicia, o 41,3 % da poboación asegura non ter consumido alcohol durante o último ano, unha cifra que sitúa a comunidade entre as que presentan unha maior proporción de persoas abstemias. Ademais, esta realidade é máis frecuente entre as mulleres que entre os homes.
A evolución resulta significativa se se compara coa situación de hai vinte anos. A porcentaxe de galegos que non consumen bebidas alcohólicas aumentou de forma notable, reflectindo un cambio progresivo nos comportamentos sociais e nos hábitos de lecer. O consumo habitual —entendido como a inxesta de alcohol polo menos unha vez á semana— segue presente en aproximadamente un terzo da poboación galega. Os homes continúan rexistrando taxas máis elevadas ca as mulleres en case todos os indicadores relacionados co consumo.
O informe tamén revela unha realidade aparentemente contraditoria: mentres cada vez hai máis persoas que non beben nada, unha parte da poboación mantén patróns de consumo frecuentes. España figura entre os países europeos con maior proporción de abstemios, pero tamén entre os que rexistran máis consumo diario de alcohol.
A mocidade lidera o cambio
O grupo de idade que protagoniza a maior transformación é o comprendido entre os 15 e os 24 anos. Neste colectivo, o consumo habitual reduciuse en torno a un 60 % dende 2006. Os expertos interpretan esta evolución como un cambio cultural nas novas xeracións, que amosan unha menor vinculación co alcohol como elemento central da socialización. Este descenso coincide coa perda de peso de prácticas tradicionais asociadas ao consumo, como as saídas nocturnas frecuentes ou o costume de acudir a bares de maneira habitual.
A persistencia de consumos de riscos é un reto de saúde pública
A pesar da mellora xeral, o informe advirte de que continúan existindo comportamentos preocupantes. Un deles é o denominado consumo intensivo ou binge drinking, caracterizado pola inxesta dunha gran cantidade de alcohol nun curto período de tempo. Unha parte dos consumidores concentra a inxesta durante as fins de semana, reforzando un modelo de consumo ocasional pero intenso.
Ante esta situación, Sanidade insiste na necesidade de manter e reforzar as medidas de prevención, especialmente entre os colectivos máis vulnerables. O obxectivo pasa por consolidar a diminución do consumo habitual e reducir os episodios de risco que aínda persisten.
