A publicación das primeiras listas de admisión ás universidades galegas deixou unha situación pouco habitual este curso: o Grao en Medicina da Universidade de Santiago de Compostela (USC) é o único das tres universitades galegos que pechou a matrícula xa no primeiro chamamento, cunha nota de corte de 12,844.
Os estudantes admitidos nesta titulación poderán formalizar a súa matrícula entre este mércores e o xoves ás 23.59 horas. Pola contra, o resto dos graos ofertados polas universidades galegas continuarán admitindo alumnado nos sucesivos chamamentos previstos pola Comisión Interuniversitaria de Galicia (CiUG).
A maioría das titulacións aínda manteñen prazas dispoñibles
A diferenza do que viña sendo habitual nos últimos anos, nesta primeira adxudicación só Medicina esgotou todas as súas prazas. Na USC permanecen vacantes 64 titulacións —44 no campus de Santiago e o resto en Lugo—, mentres que tanto a Universidade da Coruña (UDC) como a Universidade de Vigo (UVigo) manteñen abertas todas as súas ofertas académicas.
O segundo chamamento realizarase o vindeiro 14 de xullo, con matrícula prevista para os días 15 e 16, polo que moitos estudantes que permanecen en lista de espera aínda poderán acceder ás súas opcións preferentes.
Este escenario contrasta co rexistrado o pasado curso, cando 38 titulacións do campus de Santiago xa pecharan a matrícula na primeira adxudicación, quedando unicamente sete con prazas dispoñibles para os chamamentos posteriores.
Matemáticas e Física segue liderando as notas de corte
As primeiras notas de admisión tamén confirman que os dobres graos continúan sendo os máis demandados en Galicia. A simultaneidade de Matemáticas e Física na USC volve situarse como a titulación coa nota máis alta do sistema universitario galego, cun 13,449.
Séguelle o dobre grao de Enxeñaría Informática e Matemáticas, tamén en Santiago, cun 13,046, mentres que o Programa Académico de Percorrido Sucesivo (PARS) de Enxeñaría Aeronáutica e Aeroespacial alcanza o 13,010.
Entre os graos, Medicina mantense entre os máis esixentes, cun 12,844, moi preto de Odontoloxía, que fixa a súa nota en 12,815. Tamén destacan Biotecnoloxía (12,288) e Matemáticas (12,214).
No ámbito sanitario, Enfermaría continúa rexistrando unha elevada demanda, con notas de acceso de 11,940 en Santiago, 11,826 na Coruña e 11,466 no campus de Vigo.
Medra o interese polas enxeñarías
Os datos desta primeira adxudicación tamén evidencian un incremento do interese polas carreiras tecnolóxicas e de enxeñaría. Un dos maiores aumentos corresponde ao PARS de Enxeñaría Informática en Ourense, que pasa dunha nota de 5 no primeiro chamamento do pasado curso ata o 7,7 actual.
Tamén experimentan importantes subas Enxeñaría Eléctrica en Vigo, Xestión de Empresas Hostaleiras en Santiago ou Filosofía, que continúa consolidando a tendencia ascendente iniciada nos últimos anos.
Pola contra, algunhas titulacións reducen significativamente a súa nota de acceso respecto ao curso anterior, como Economía en Santiago ou a simultaneidade de Enxeñaría Agrícola e Agroalimentaria con Enxeñaría Forestal.
Que ocorre cos estudantes en lista de espera?
A resolución deste primeiro chamamento pode dar lugar a diferentes situacións para o alumnado. Quen obtivo praza na súa primeira opción ten garantida a matrícula, mentres que aqueles admitidos nunha opción inferior poden reservar a súa praza á espera de que evolucionen as listas das titulacións preferentes.
Os estudantes que continúan en lista de espera deberán confirmar que desexan permanecer nela e seguir atentos aos próximos chamamentos, previstos para os días 14, 21, 24 e 29 de xullo, ademais do 2, 9 e 23 de setembro e o 9 de outubro, datas nas que se completará definitivamente o proceso de admisión ás universidades galegas.
