A praia das Catedrais permanecerá pechada ao público o vindeiro 12 de agosto e ata as 7:30 horas da mañá do día seguinte como medida preventiva ante a masiva afluencia de visitantes que se agarda con motivo do eclipse total do Sol. A decisión foi acordada polo Concello de Ribadeo en coordinación coa Consellería do Medio Ambiente e os distintos corpos de seguridade.
O areal de Ribadeo será un dos puntos privilexiados para observar o fenómeno, xa que se poderá contemplar dende aí aproximadamente un minuto e 45 segundos, un dos tempos máis prolongados de visibilidade do eclipse en Galicia. Para facilitar o seguimento do evento sen comprometer a protección do espazo natural, habilitarase unha zona de observación no aparcadoiro público das Catedrais, onde se instalará unha pantalla xigante dende a que se emitirán explicacións divulgativas sobre o eclipse e tamén sobre a choiva de estrelas das Perseidas. As intervencións estarán guiadas polo astrónomo José Ángel Docobo, catedrático da Universidade de Santiago de Compostela e director do Observatorio Ramón María Aller.
As restricións habituais da praia das Catedrais
As restricións na praia non é nada novo e a decisión de pechala durante a xornada do eclipse enmárcase nas medidas de protección que xa se aplican habitualmente nun dos enclaves turísticos máis concorridos de Galicia. A praia das Catedrais leva anos sometidas a un sistema de control de acceso gratuito debido á enorme afluencia de visitantes que recibe, especialmente durante a tempada alta para garantir tanto a conservación do espazo como a seguridade dos visitantes.
Segundo explicou o alcalde de Ribadeo, Dani Vega, o operativo foi deseñado tras varias reunións de coordinación entre administracións. Ademais do peche do areal, tamén quedará suspendida a emisión dos habituais permisos de acceso para esas datas.
Dende o Concello consideran que o eclipse representa unha oportunidade para promocionar Ribadeo como destino de referencia para a observación astronómica, ao tempo que se garante a conservación dun dos espazos naturais máis emblemáticos da costa galega.
