A compañía aérea húngara Wizz Air incorporará ao aeroporto de Santiago de Compostela á súa rede en España coa apertura de tres conexións directas con Madrid, Valencia e Bilbao a partir do próximo mes de novembro. A venda de billetes xa está dispoñible e a aeroliña ofrecerá varias frecuencias semanais en cada unha das rutas.
Segundo a programación publicada pola aeroliña, a ruta entre Santiago e Bilbao contará con catro frecuencias semanais a partir dos 19,99 euros, mentres que a conexión con Madrid operará tres días á semana a partir de 14,99 euros. Por outro lado, a partir de 29,99 euros, Valencia tamén disporá con catro frecuencias semanais. As conexións que terá Santiago con Valencia e Bilbao comezarán o 2 de novembro e Santiago – Madrid o 3 de novembro.
O anuncio forma parte da estratexia de crecemento de Wizz Air no mercado español, onde a compañía busca ampliar a súa presenza con novas rutas e aeroportos. A incorporación de Santiago ao seu mapa de operacións consolida o peso crecente do aeroporto de Lavacolla, que nos últimos anos experimentou unha notable expansión da súa oferta de destinos nacionais e internacionais.
Estas novas rutas sumaranse á oferta dun aeroporto que vén de completar recentemente importantes actuacións de mellora nas súas infraestruturas e que afronta a tempada alta cunha programación reforzada. A incorporación de Wizz Air contribuirá a incrementar a conectividade de Santiago e a súa capacidade de atraer novos fluxos de viaxeiros
