A Deputación de Lugo iniciou as obras de construción da nova ponte sobre o río Azúmara, na estrada provincial LU-P-1611, unha actuación destinada a resolver un dos tramos máis problemáticos do coñecido como cinto comarcal. Os traballos contan cun orzamento de 650.000 euros e suporán a ampliación da infraestrutura, que pasará dos actuais cinco metros de ancho a unha plataforma de once metros.
Co inicio das obras, a estrada permanecerá pechada ao tráfico, agás para residentes. Os vehículos serán desviados entre Mosteiro e Castroverde pola LU-P-1204, unha medida que se manterá durante os nove meses previstos para a execución do proxecto.
Melloras nun dos treitos máis conflitivos
A actuación afecta a un tramo de algo máis dun quilómetro, entre os puntos quilométricos 106,5 e 107,8, no municipio de Castroverde. O proxecto inclúe a demolición da ponte actual, a construción da nova estrutura, a renovación da sinalización e diferentes actuacións ambientais, como a revexetación dos noiros e a plantación de árbores unha vez rematen as obras.
A ponte existente é un dos puntos máis estreitos da LU-P-1611, unha circunstancia que dificulta o cruce de vehículos e condiciona a seguridade da circulación nunha estrada con elevado volume de tráfico.
Unha vía estratéxica para a provincia
O cinto comarcal é unha das principais vías da rede provincial, xa que comunica directamente once concellos lucenses e enlaza con infraestruturas como a A-6, a A-54 e a N-540. Desde 2020, a Deputación investiu preto de cinco millóns de euros na mellora desta estrada, renovando máis de 42 quilómetros, o que representa arredor do 36 % do seu trazado.
