Os tardeos e noiteos promovidos polo Concello de Lugo despídense neste mes de setembro cunha ampla variedade de actuacións musicais, obradoiros, e actividades para todas as idades nas diferentes zonas da cidade. Esta programación enmárcase no movemento Localmente Lucense que o executivo municipal puxo en marcha, a través da área de Desenvolvemento Local e Emprego, que dirixe a edil Ana Abelleira, para dinamizar as rúas e os barrios lucenses e impulsar as compras e o consumo no comercio e a hostalería local.
A próxima das actividades será o tardeo organizado este xoves día 1 na Rúa Rafael de Vega cun xogo de palas, Spiribol Challenge, e o DJ Marcos Peón. Pola noite celebrarase o noiteo na praza do Campo cunha actuación musical con Deté. O venres será o turno do tardeo na Fonte dos Ranchos cun «funny photocall», obradoiros de maquillaxe e atrezzo e DJ Alex Nite. O noiteo será no cruce As Gándaras cun monólogo de Lois Pérez. O sábado e o domingo tamén haberá actividades e estas continuarán hasta final de mes.
“Os tardeos e noiteos, xunto con outras actividades como os mercadiños á beira do Miño ou as festas temáticas que organizamos na Tinería durante o verán están a resultar un éxito tanto pola participación de veciños e veciñas como pola oportunidade que supoñen estas citas para o comercio e a hostalería da cidade”, valorou Ana Abelleira.
Os tardeos de setembro terán lugar en horario de 17:00 a 20:00 horas, mentres que os noiteos celebraranse de 21:00 a 23:00 horas.
Almorzo de negocios Localmente Lucense
Así mesmo, a edil lembrou que “mañá, xoves, volven os almorzos de negocios que impulsamos dende o executivo municipal para que o empresariado e os emprendedores amplíen a súa rede de contactos co fin de xerar novas oportunidades de negocio e de emprego”.
Será o quinto que se desenvolverá este ano. Para facilitar á participación, se van organizando en distintos barrios, tamén como unha oportunidade de mobilizar os comercios e negocios da zona. Nesta ocasión, celebrarase na cafetería Pasarela -Rúa Frai Plácido Rei Lemos, 1-, en horario de 08:30 a 09:30 horas. Hoxe é o último día para inscribirse a través da páxina web.
