Sempre pensei que no mundo había dous tipos de persoas, as que tiñan sorte e ás que esta nunca lle acompañaba. E que isto non dependía dun ou dunha, senón que era totalmente alleo, a sorte viña ou non viña. Nada máis lonxe da realidade. A ciencia dinos que esta crenza tan estendida, non é real. Resulta que a sorte depende de cada un e cada unha de nós, porque a sorte é unha cuestión de actitude.
Así o conclúe o psicólogo Richard Wiseman, quen realizou unha exhaustiva investigación na que observou de maneira clara que boa parte da fortuna ou a ausencia dela ten que ver coa actitude das persoas. E o demostrou cientificamente.
Pois ben, parece que as persoas que teñen unha actitude proactiva, aquelas que non teñen medo aos cambios, aquelas que saen con asiduidade da zona de confort, e que buscan as oportunidades, son aquelas ás que a sorte acaba sorrindo.
No outro polo están aquelas persoas que non fan intentos, as que ven sempre a vida con pesimismo (o vaso medio baleiro), e as que se bloquean ante novos retos ou desafíos.
Podería dicirse entón, que a sorte ten moito que ver coa propia personalidade. O optimismo é un factor protector do benestar, e facilitador da sorte. A ansiedade, pola contra, exerce como factor de risco sobre o benestar, e entorpece o éxito persoal e profesional.
Nesta investigación Wiseman tamén descubriu que a sorte está moi condicionada polo traballo individual, é dicir, que as persoas que teñen presente a cultura do esforzo, máis cedo que tarde acaban tendo sorte; isto é, acaban encontrando un bo emprego, aprobando un complicado exame de oposición, construíndo lazos persoais de calidade, etc. De novo, a actitude volve a ser crucial para atraela sorte.
Seguro que moitas e moitos de vós algunha vez escoitastes iso de seguila intuición, pois a Psicoloxía tamén nos di que esta facultade non é algo máxico, senón máis ben unha cuestión científica. O que coloquialmente coñecemos por intuición ou “corazonada” non é máis que a acumulación de aprendizaxes, de experiencias, que fan que nos resulte máis doado coller un determinado camiño ou tomar unha determinada decisión.
E é así porque o noso cerebro é unha auténtica máquina rexistradora, que ben no consciente ou máis ben no inconsciente, grava a lume os itinerarios máis acertados e tamén aqueles que non o son. Desta maneira, o cerebro facilítanos a vida, aínda que en último termo depende de nós facerlle caso.
A sorte aliméntase tamén da confianza, da que temos que ter nas demais persoas, e especialmente da que temos que ter sobre nós mesmos e mesmas. E aquí si que parece que existe unha relación lineal, a máis confianza, maior sorte e viceversa. Por que? Porque a confianza aumenta o rendemento, a ilusión, o optimismo, diminúe o estrés e a ansiedade e incrementa a tolerancia á dor e ao fracaso. Un súper sentimento!
Así que amiga ou amigo que les estas liñas, a sorte non vai facer que mañá che toque a lotería, porque iso non é sorte, iso é azar. Para o resto de cuestións, confía en ti, mantén unha actitude positiva, traballa duro e segue a túa intuición. Agardemos que a receita perfecta ofreza resultados extraordinarios.
