O BNG pedirá explicacións no Parlamento de Galicia polos vertidos aos ríos Mera e Baleo en Ortigueira da man dunha iniciativa presentada polo deputado no Parlamento, Mon Fernández, quen mantivo reunións con varios colectivos veciñais acompañado polo candidato á alcaldía, Marco Schaal.
«Estamos a falar de lugares que fan parte da Rede Natura 2000, no caso do río Mera, e de lugares que estiveron propostos para a súa ampliación, como é o caso do río Baleo, cando o Goberno galego, atendendo aos requirimentos da UE traballaba para a ampliación desta Rede», apunta o BNG, que recorda que durante o pasado mes de abril os veciñosde diferentes zonas de Ortigueira polas que pasan os ríos Mera e Baleo denunciaron o mal estado das súas augas e en algún caso mesmo mal olor.
«Estamos a falar de espazos naturais de gran valor e que deberan gozar dun grao de protección moi superior ao que actualmente teñen: feitos como estes vertidos e a súa reiteración proban esta desprotección, que ademais ten a agravante de ser susceptíbel de afectar á biodiversidade e á produción marisqueira da Ría de Ortigueira-Ladrido, actualmente en niveis de produción xa historicamente baixos», continúa.
Os veciños e veciñas «non dubidan en sinalar o polígono industrial das Somozas no caso do mal estado das augas do río Mera, e á canteira do lugar de Lombao no Concello de Ortigueira no caso do río Baleo».
O BNG entende que «a Xunta de Galicia, que ostenta en exclusiva as competencias tanto en protección do medio ambiente e, nomeadamente, no control das augas, como en todo o relacionado coa produción marisqueira, debería exercelas con moita máis dilixencia e comezar por determinar cal é a causa real destes vertidos e despois actuar para que non se volvan repetir».
