A crecente preocupación polo estado da lagoa de Baldaio deu o salto á mobilización cidadá. Veciñanza, mariscadoras, mariscadores e usuarios habituais deste espazo natural convocaron para este venres, ás 20.30 horas, unha concentración na ponte da ría para esixir unha intervención urxente que permita reabrir a canle de comunicación co mar e frear o deterioro ambiental que sofre o humidal.
Os promotores da protesta alertan de que o peche da desembocadura, provocado pola acumulación de area, está agravando a situación día tras día e advirten de que, se non se actúa, o problema podería derivar de novo en inundacións durante o outono. Baixo o lema de que «non podemos permitir que este espazo se perda», fan un chamamento á participación cidadá para reclamar unha resposta contundente das administracións.
Como símbolo da protesta, os asistentes están convidados a levar unha pa de plástico de xoguete, coa intención de representar de maneira simbólica a retirada da area que bloquea a saída da lagoa ao mar. Con este xesto pretenden evidenciar a implicación da sociedade na defensa dun dos humidais máis importantes de Galicia e reclamar medidas que garantan a súa conservación.
O Concello insiste na necesidade dunha actuación inmediata
A mobilización prodúcese poucos días despois de que o Concello de Carballo reiterase á Xunta a necesidade dunha actuación inmediata ante o peche da bocana, unha situación que se prolonga desde o pasado mes de maio. O goberno local remitiu recentemente novos escritos á Dirección Xeral de Patrimonio Natural solicitando unha avaliación técnica urxente para evitar danos ambientais e económicos que consideran irreversibles.
A situación resulta especialmente preocupante porque a lagoa xa sufrira unha crise similar hai apenas uns meses. Cando a actividade marisqueira comezaba a recuperarse, o humidal volveu quedar practicamente illado do mar, reabrindo o debate sobre a necesidade de aplicar solucións estables que eviten que o problema se reproduza cada ano.
O BNG reclama unha solución definitiva para Baldaio
Paralelamente á mobilización veciñal, o deputado do BNG, Óscar Insua, e o concelleiro de Medio Ambiente de Carballo, Miguel Vales, reuníronse co presidente da asociación de mariscadores de Baldaio, Alberto Sánchez, para analizar a situación.
Os nacionalistas reclaman que a Xunta adopte de inmediato as medidas necesarias para recuperar o fluxo natural de intercambio de augas entre a lagoa e o mar, co obxectivo de preservar a biodiversidade e garantir a continuidade da actividade marisqueira.
Insua criticou a falta de criterio da Administración autonómica ao lembrar que hai poucos meses se defendía a apertura da canle e agora se sostén a postura contraria. Ademais, anunciou a presentación de novas iniciativas no Parlamento galego para reclamar unha solución definitiva a un problema que considera recorrente.
Pola súa banda, Miguel Vales incidiu no elevado valor ambiental, social e económico de Baldaio para o municipio de Carballo e advertiu de que o bloqueo da canle está a provocar importantes consecuencias tanto para o ecosistema como para o sector marisqueiro.
Desde o Consello Local do BNG subliñan que Baldaio forma parte da identidade de Carballo e consideran que xa non abondan actuacións puntuais cada vez que aparece o problema. Defenden un compromiso estable por parte da Xunta que garanta a correcta xestión deste espazo protexido e evite que mariscadoras e mariscadores teñan que afrontar periodicamente unha nova crise ambiental.