Case trinta anos despois do seu inicio, o Plan Paradai continúa sen pecharse en Lugo. A mellora da rúa Serra de Meira, unha das últimas actuacións estruturais pendentes, volveu situar este programa histórico no centro do debate institucional tras a decisión do Concello de esixir á Xunta de Galicia que cumpra o acordo alcanzado en outubro de 2025 e execute con urxencia unha obra que leva anos madura, pero segue sen executarse.
O Goberno local decidiu non asinar o convenio remitido pola administración autonómica ao considerar que o texto non recolle o compromiso de que a Xunta asuma o 100 % do custo da actuación, tal e como fora pactado. “O Concello actuou con rigor e lealdade institucional desde o primeiro momento; agora é a Xunta quen debe cumprir coa súa palabra”, sinalou o alcalde, Miguel Fernández, ao explicar unha decisión que mantén bloqueada unha intervención considerada estratéxica para a zona leste da cidade.
Un plan concibido en 1999 que segue sen pecharse
O Plan Paradai naceu en 1999 cun acordo entre Xunta, Deputación e Concello para investir arredor de 10 millóns de euros en tres anualidades e romper o illamento histórico dos barrios situados ao outro lado da vía do tren. Co paso dos anos, o investimento previsto superou os 13 millóns e executáronse actuacións clave, como a Ponte Paradai, a glorieta de acceso a Serra de Meira, a ampliación da rúa Duquesa de Lugo, reformas en viarios do entorno e a recuperación do espazo fluvial do río Rato.
Porén, o plan foi acumulando fases inconclusas, atrasos administrativos e reproches cruzados entre administracións de distinto signo político. Durante anos, a Xunta mantivo consignacións orzamentarias recorrentes para Lugo, especialmente a partida anual de 500.000 euros, que se computaban como investimento comprometido, pero que non acababan traducíndose en obra executada.
A rúa Serra de Meira converteuse así nun dos principais símbolos do plan inconcluso. Non só pola súa función como eixo viario da zona leste, senón polos problemas persistentes de seguridade, mobilidade e inundacións na glorieta, agravadas polas crecidas do Rato.
Un acordo incumprido e unha obra parada
Xa en 2021, Concello e Confederación Hidrográfica Miño-Sil pecharon un acordo para reducir o risco de inundación na glorieta de Serra de Meira, cun investimento que foi incrementándose mediante adendas ata superar os 700.000 euros debido á suba dos custos. A maior parte dese orzamento está xa consignada para este exercicio.
Segundo o Goberno local, este avance deixa sen fundamento calquera escusa técnica ou urbanística. A actuación non require modificación do PXOM e o proxecto estaba practicamente listo para a súa tramitación. “Non existe ningún impedimento técnico nin urbanístico que xustifique máis atrasos”, insistiu Miguel Fernández, quen recalcou que todo o que dependía do Concello está cumprido.
O conflito actual xorde coa remisión dun convenio que, segundo o executivo municipal, chegou con atraso e non reflicte o acordo acadado na reunión do 14 de outubro de 2025, na que se estableceu que a Xunta asumiría integramente o custo da obra. O Concello comunicou formalmente esta circunstancia á Consellería e solicitou a remisión dun novo texto que respecte o compromiso adquirido, mantendo a súa disposición á colaboración institucional. Fernández asegurou que, en canto o proxecto sexa presentado oficialmente, “activarase de inmediato toda a tramitación administrativa necesaria, incluída a posta a disposición dos terreos que a Xunta afirma precisar”.
Mentres o desacordo administrativo se prolonga, a realidade en Serra de Meira apenas cambia. A vía segue soportando un tráfico intenso, presenta un progresivo deterioro do firme e mantén problemas de seguridade e mobilidade, especialmente nos episodios de choiva. “O atraso acumulado nesta intervención é especialmente prexudicial para a veciñanza”, advertiu o alcalde, que lembrou que esta actuación forma parte dun Plan Paradai concibido para executarse en poucos anos e que, case tres décadas despois, continúa sen rematar.
Ademais de Serra de Meira, seguen pendentes outras actuacións previstas no plan, como a mellora da Calzada das Gándaras, outro compromiso que o Concello asegura que seguirá reclamando. Concibido para coser a cidade e superar unha barreira histórica, o Plan Paradai entra no seu terceiro decenio cun balance desigual e cun final que, segundo o Goberno local, segue dependendo de que a Xunta pase definitivamente dos compromisos escritos á obra real.
