Un ano despois da súa investidura, o presidente da Xunta, Alfonso Rueda, afronta unha batería de críticas por parte do PSdeG, que non dubida en cualificar este primeiro ano de mandato como un período “baleiro, decepcionante e sen rumbo”. Os socialistas galegos acusan ao líder do PPdeG de gobernar con piloto automático, sen proxectos concretos e sen respostas ante os grandes retos que ten Galicia por diante.
“Cero proxectos, cero xestión e cero respostas”. Así resumiu Lara Méndez, viceportavoz do Grupo Parlamentario Socialista, o que, ao seu xuízo, deixou Rueda tras 365 días na Presidencia da Xunta. Pero as críticas foron máis aló: segundo Méndez, o presidente está máis centrado en coidar a súa imaxe e en controlar os medios de comunicación —a través dunha nova lei— que en exercer con responsabilidade o seu cargo. “Cando Galicia precisa un presidente que dea un paso adiante, Rueda agocha a cabeza”, lanzou.
A sanidade e a vivenda convertéronse nos principais campos de batalla. Méndez puxo cifras enriba da mesa: máis de 220.000 persoas agardan por unha cita cun especialista e case 51.000 por unha cirurxía. “Falamos de xente que vive con dor e con incerteza, mentres a Xunta lles dá as costas”, denunciou. A situación nos centros de saúde é igualmente preocupante, segundo explicou, con atención primaria colapsada e moitos sen pediatras.
E mentres todo isto sucede, o presidente, segundo a socialista, actúa como se nada pasase. “Chegamos ao esperpento de escoitalo dicir que a sanidade funciona perfectamente… mentres cae o teito do hospital de Ourense”, ironizou.
No terreo da vivenda, o diagnóstico tamén é demoledor: desde 2015, o prezo do alugueiro subiu un 58% en Galicia, mentres que os salarios só medraron un 25%. Resultado: moitos mozos e mozas deben entregar case a metade do seu soldo para pagar un piso. “É simplemente insostible”, advertiu Méndez.
José Ramón Gómez Besteiro, secretario xeral do PSdeG, foi igual de contundente. A súa crítica engadiu perspectiva histórica: lembrou que Rueda leva só un ano como presidente, pero foi o número dous de Feijóo durante máis dunha década. “Os dezaseis anos de políticas erradas do PP tamén levan a súa marca”, afirmou.
Para Besteiro, Galicia leva demasiado tempo atrapada nun modelo político sen ambición. “Non hai liderado nin proxecto claro”, sentenciou. E puxo como exemplo o apoio da Xunta ao proxecto da macrocelulosa de Altri en Palas de Rei: unha iniciativa, dixo, “innecesaria, con forte contestación social e que non responde ao modelo de país que precisamos”.
Os socialistas tamén cargaron contra a “tibieza” de Rueda na crise dos aranceis, que afecta directamente a sectores produtivos galegos. Mentres outras comunidades xa activaron medidas, en Galicia, aseguran, a Xunta chega tarde e mal. “Convoca agora unha reunión, á que nin sequera asistirá, e sen garantías de que se vaian tomar decisións concretas”, lamentou Méndez.
O propio Besteiro envioulle recentemente unha carta ao presidente ofrecéndolle colaboración e solicitando unha reunión urxente para abordar a situación. “Unha man tendida que foi rexeitada”, asegurou, interpretando esta negativa como un novo xesto de desinterese por parte dun presidente “máis preocupado pola súa imaxe que polos problemas da xente”.
Fronte a esta actitude, os socialistas reclaman un proxecto político sólido, con visión de futuro, centrado no reforzo dos servizos públicos, o acceso á vivenda, o benestar social e o desenvolvemento sostible. “Mentres o PP dorme, nós propoñemos”, reivindicou Méndez. “Non miramos para outro lado: poñemos os intereses de Galicia por diante”.
Durante a súa intervención, a deputada tamén quixo expresar o apoio do grupo socialista á ministra Pilar Alegría, tras ser obxecto de insultos e ameazas machistas nas redes sociais. “Por moito que algúns pensen o contrario, hai liñas que non se deben cruzar. Non todo vale”, advertiu.
Méndez abriu e pechou a súa intervención cun ton reivindicativo. Comezou cun saúdo republicano e unha lembranza do 14 de abril como data simbólica para homenaxear a quen loitou pola liberdade, a igualdade e a solidariedade. E rematou cunha mensaxe de memoria e xustiza para as vítimas do franquismo que aínda permanecen nas cunetas: “Memoria, dignidade e xustiza”.
