O Grupo Municipal Socialista solicitará este xoves no pleno da corporación municipal que inste á Xunta de Galicia a que destine a Ferrol de maneira permanente unha unidade da Policía Autonómica. Na moción que defenderá engádese que esta unidade deberá contar cunha dotación material e humana suficiente para poder cumprir de maneira eficiente coas súas funcións.
Dende o PSOE lémbrase que na actualidade a Policía Autonómica está implantada en seis das sete grandes cidades de Galicia, pero que Ferrol leva agardando 23 anos para dispor dunha unidade, o cal non é admisible. En Santiago implantouse en 1991, mentres que en A Coruña, Lugo, Ourense e Pontevedra foi en 1994 e en Vigo en 1997. Tamén se destaca que a unidade policial depende organicamente do Ministerio do Interior, aínda que funcionalmente da Xunta de Galicia.
Na actualidade, a Policía Autonómica presta importantes funcións en materia de seguridade, de protección das vítimas de violencia machista, de prevención e investigación de incendios forestais, de loita contra o furtivismo, de protección do medio natural e do patrimonio e de protección de menores, entre outras. Por ese motivo, «semella, ademais de preciso, que é de xustiza que Ferrol, como o sétimo concello de Galicia por número de habitantes, dispoña dunha unidade», explican os socialistas.
