O delegado do Goberno en Galicia, Javier Losada, instou á Xunta de Galicia a que apoie ao persoal de Siemens Gamesa nas Somozas (A Coruña). Fíxoo nunha carta dirixida ao vicepresidente segundo e conselleiro de Economía, Empresa e Innovación, Francisco Conde.
Na misiva lembra que o pasado martes mantivo unha reunión cos representantes do comité de empresa, que mostraron a súa preocupación pola situación da compañía, que ten 300 empregos. O persoal abordou a carga de traballo e a necesidade de novos investimentos para a modernización da factoría, que lle permitan seguir sendo punteiros na fabricación de pas.
Javier Losada explica á Xunta que o comité de empresa relata que, neste momento, non dispón de ningún documento que recolla o plan industrial da empresa, que ten uns resultados económicos moi positivos.
Dado que é a Consellería que dirixe Conde desde hai 8 anos a que aúna as competencias exclusivas en materia de política industrial, o delegado do Goberno trasládalle, coa procura de cooperación entre institucións, todas esta información e ínstao a que tome determinacións nese sentido.
