O Concello de Cariño recuperou e puxo ao dispor de todos os veciños e veciñas do municipio a antiga ‘Revista Nordeste’, unha publicación na que está documentada unha parte importante da historia da vila e á que se pode acceder a través da web www.revistanordestecarino.gal.
A Concellería de Cultura, consciente do interese patrimonial e cultural desta publicación, púxose en contacto con Lorenzo Fojón, que no seu momento era un dos encargados das portadas e ilustracións da revista, para conseguir a cesión de todos os exemplares e proceder á súa dixitalización.
Agora, este traballo ve a luz a través da páxina web na que todo aquel que o desexe poderá visualizar e descargar todos os números da revista. A idea inicial do Concello de Cariño era a de realizar un acto público de presentación de leste proxecto pero, debido ás restricións do Estado de Alarma, finalmente optouse por facer pública a web.
O alcalde de Cariño, José Miguel Alonso Pumar, quixo agradecer a Lorenzo Fojón “a cesión de todos os exemplares xa que sen a súa colaboración este proxecto non sería posible” e animou aos veciños e veciñas de Cariño “a que gocen da revista e tamén dunha parte da nosa historia”.
Historia da revista
A revista Nordeste nace no ano 1975, no seo da Agrupación Xuvenil que leva a súa mesmo nome a iniciativa de dous párrocos, Francisco Martínez Sánchez “ Pacurri” e Atilano Maciñeira, e do grupo de mozos e mozas que forma parte da asociación. Outro sacerdote, Salustiano Pedre, xoga tamén un papel relevante nos primeiros anos da revista.
Desde un primeiro momento a publicación convértese en portavoz do pobo de Cariño, recollendo as súas reivindicacións por un Concello propio, as loitas a favor dun instituto de secundaria… así como dos acontecementos que teñen lugar durante lestes anos (actividades culturais, deportivas e mesmo bautizos, matrimonios ou defuncións).
A publicación distribuíase polas parroquias pero tamén por Galicia e mesmo unha parte importante da súa tirada enviábase aos veciños e veciñas de Cariño que estaban emigrados en Francia, Suíza, Inglaterra.
