O constante crecemento do turismo activo representa tamén un reto á hora de conxugar as actividades deportivas ou de aventura que demandan os viaxeiros coa preservación do medio rural. As novas tendencias do mercado turístico, no que se empeza a demandar unha tipoloxía de turismo con implicación directa do viaxeiro no medioambiente, contribúe a valorar a contorna, pero se non se fai responsable, córrese o risco de destruílo.
Enténdese por empresas de turismo activo aquelas que realizan, baixo o respecto ao medio rural e ao medio ambiente, actividades turístico-deportivas e de lecer que se practiquen servíndose basicamente dos recursos que ofrece a propia natureza no medio no que se desenvolven.
Por iso, entidades como a Asociación Galega de Empresas de Turismo Activo e Natureza (AGETAN) teñen entre as súas misións o desenvolvemento de actividades e proxectos educativos, de protección e coidado de medio ambiente. A entidade ofrece asesoramento e protocolos ás empresas adheridas co fin de preservar e conservar o medio natural e reducir a pegada ecolóxica no desenvolvemento dos servizos das empresas do sector.
O Ecoturismo, cuxa “prioridade é contribuír á conservación do espazo natural” repercutindo positivamente na poboación local, preséntase como unha das tendencias máis importantes dos últimos anos. O Ecoturismo e o Turismo Activo preséntanse como dúas caras da mesma moeda e unha das maiores garantías que existen para preservar o medio natural son certificacións que outorga a Unión Europea a través da Carta Europea de Turismo Sostible, a Rede de Geoparques, a Rede de Reservas da Biosfera e, pronto, pola Rede Natura 2000.
Por iso, á hora de contratar calquera actividade, é fundamental saber se a empresa que vai prestarnos este servizo cumpre con todas as certificacións que a acreditan como unha empresa responsable co medio ambiente.
