O centro comercial Gran Vía de Vigo acolleu este martes a presentación da nova camisola da Selección Galega de fútbol. O acto contou coa presenza do dianteiro do RC Celta, Borja Iglesias, unha das caras visibles da Real Federación Galega de Fútbol (RFGF).
O novo deseño, obra de Adidas e Fútbol Emotion, presenta unha base branca e un estilo sobrio e clásico, no que destacan finas liñas e detalles en azul celeste, cores vencelladas á identidade galega. “Guau, encántame!”, exclamou o compostelán Borja Iglesias ao ver a camisola en primicia.
O evento converteuse nun punto de encontro no que os afeccionados puideron conversar e sacarse fotos con Iglesias, así como co exgardameta celtista Sergio Álvarez.
