A Unión de Consumidores de Galicia publica un manifesto no que denuncian que a autopista AP-9, arteria principal que vertebra o territorio galego, converteuse nunha «barreira económica insoportable» e nun “símbolo de discriminación territorial”.
A asociación sinala que, mentres noutros puntos do país levántanse as barreiras e rescátanse concesións, “en Galicia seguimos encadeados a unha das autoestradas máis caras do Estado”. Tamén critican que “as peaxes sufrisen unha suba acumulada de máis do 25% desde 2022, asfixiando os salarios dos cidadáns e a competitividade das nosas empresas”.
O manifesto alerta ademais sobre a legalidade da concesión: “A Comisión Europea cuestiona no seu ditame de xullo de 2025 que a prórroga, que nos condena a pagar peaxes ata o ano 2048, respecte a legalidade comunitaria. Non queremos seguir sendo reféns dun contrato baixo sospeita”. En relación ao trato desigual respecto doutros territorios, aseguran “ser cidadáns de segunda» e esixen «o mesmo trato que outras comunidades”.
Para visibilizar a demanda, a Unión de Consumidores de Galicia acaba de abrir unha petición en Change.org, na que xa se pode apoiar a reclamación do traspaso da titularidade da AP-9 á Xunta, o rescate da concesión e a anulación das subas abusivas, abrindo así un horizonte real de gratuidades para unha infraestrutura que, lembran, “é de todos e para todos”.
