O festival Carballo Interplay acollerá este ano unha edición especial do podcast ‘Rajando con…’ protagonizada por Samantha Hudson e María Barrier, creadoras de Bimboficadas. A cita será o venres 17 de abril ás 22:00 horas no mercado de Carballo, nun espectáculo único que só se poderá gozar en directo.
Será a primeira vez que Samantha Hudson, artista e icono da xeración Z, e María Barrier, xornalista e actriz, achegan a Galicia o seu proxecto sonoro, que combina humor, ironía e unha ollada crítica sobre cuestións de actualidade. Temas como a identidade de xénero, a precariedade laboral, a saúde mental ou os debates da esfera pública pasarán polo tamiz do seu estilo irreverente e sen filtros, mesturando sátira, cultura pop e comentario social.
Esta actuación súmase ao anuncio de Pop y Muerte, o podcast conducido por Kiko Amat e Benja Villegas, que poderá escoitarse en directo o sábado 18 de abril ás 22:30 horas no mesmo espazo. Con estes primeiros anuncios, o festival comeza a debuxar unha edición marcada pola presenza dalgunhas das voces máis recoñecibles do panorama dixital actual.
Samantha Hudson é cantante, compositora, produtora, guionista e actriz, coñecida pola súa traxectoria vangardista e pola súa defensa da liberdade de expresión a través de espectáculos impactantes. María Barrier, pola súa banda, desenvolve unha carreira como xornalista e actriz, colaborando con medios como Acero e Metal Magazine, presentando coloquios en Filmin e participando no podcast Esta noche libro da SER.
Carballo Interplay, organizado polo Concello e Turismo de Carballo coa produción e dirección de Cósmica, é un festival de pensamento e contidos dixitais que desde Galicia se consolidou como espazo pioneiro para impulsar novas linguaxes audiovisuais en internet. O festival tamén mantén unha aposta firme polo ecosistema creativo en galego, a través de premios á creación e á produción de contido dixital na nosa lingua, visibilizando e profesionalizando a mocidade que crea en plataformas como YouTube, TikTok ou Instagram.
