Todo o corpo de Triatlón Ferrol está conmocionado tras coñecer o aparatoso accidente vivido por un dos seus compañeiros, Jose Garrote, nas inmediacións do polígono Río do Pozo de Narón tras ser atropelado por un camión.
O tráxico suceso tivo lugar o pasado xoves 10 de setembro cando o triatleta estaba adestrando só coa súa bicicleta para preparar as sucesivas competicións deportivas, tras o retraso do calendario motivado polo parón debido á crise sanitaria. Foi nese momento cando un camión que se incorporaba dende a autovía procedente das Pontes non respetou un stop e provocou a estrepitosa caída do triatleta.
Segundo informan dende a entidade deportiva, inmediatamente despois do accidente Jose Garrote foi trasladado de urxencia á UCI no Hospital Arquitecto Marcide pola gravidade das súas feridas, con seis costelas e unha clavícula rotas. Tal e como informaron os seus familiares máis achegados, o deportista encóntrase relativamente ben despois da caída e xa non precisa coidados intensivos.
Porén, dende a entidade deportiva piden moita precaución na estrada para evitar sucesos de tal magnitude, sendo este o primeiro de tal seriedade que viven. O único ocorrido ata o momento fora hai un par de anos, cando o director técnico de Triatlón Ferrol sufrira a rotura dunha clavícula tras caerse da súa bicicleta.
