Do 19 ao 23 de maio, Cans volve facer o que mellor sabe: transformar unha pequena parroquia do Porriño nun gran punto de encontro para o cine, a música e a creatividade. A 23ª edición do festival chega con enerxía renovada e con esa mestura xa inconfundible de agroglamour, proximidade e desparpaxo que o converteu nunha cita única no calendario cultural galego.
Máis de 100 obras audiovisuais e 30 estreas
Este ano, o festival volve tirar a casa pola ventá cunha programación que supera o centenar de obras audiovisuais, arredor de 30 estreas e unha selección que pon o foco nas preocupacións e debates da sociedade contemporánea. Temas como o despoboamento, o medio ambiente ou as narrativas LGTBIQ+ atravesan moitas das propostas, que se expresan a través de distintos xéneros e formatos.
En competición oficial proxectaranse 35 curtametraxes, ás que se suman unhas 20 pezas na sección de videoclips. Ademais, o festival incorpora novas seccións e contidos paralelos, entre eles o avance da serie documental El balance de los daños, centrada no final do grupo Siniestro Total, coa participación do seu director Mikel Clemente e de Julián Hernández. Cine en todas as súas formas, música en cada recuncho e, sobre todo, un ambiente que só se entende cando se vive en Cans.
Julio Medem, cineasta e convidado estrela
Un dos nomes propios desta edición será o cineasta Julio Medem, referente do cinema español contemporáneo, con títulos como Vacas, La ardilla roja ou Lucía y el sexo. Medem protagonizará o coloquio central no Torreiro de Cans, onde ademais recibirá a súa estrela, e a súa última película, 8, será proxectada no festival.
A inauguración oficial terá lugar o xoves 21 no Círculo Recreativo coa proxección de La buena hija, de Júlia de Paz, nun pase que contará coa presenza da directora, dos actores Janet Novás —Chimpín de Prata deste ano— e Julián Villagrán, e do produtor Sergio Grobas.
Cans reforza ademais o seu papel como punto de encontro profesional, coa presenza de máis de 200 profesionais do sector audiovisual. Parte deles participarán na presentación do Hub Audiovisual da Zona Franca, consolidando o festival como espazo de conexión entre creación e industria.
A dimensión internacional chegará coa cineasta canadense Andrea Bussmann e co foco dedicado ao realizador portugués Paulo Carneiro. A isto súmanse coloquios con nomes como María Vázquez, Manuel Manquiña, Uxía Blanco, Eloy Domínguez ou Álvaro Gago, ademais da Premio Pedigree Jaione Camborda. O xurado contará tamén con profesionais como Sonia Méndez, Paula Veleiro, Miryam Gallego, Lorena Iglesias, Carlos Amoedo ou Xoán Fórneas, entre outros.
Rural, comunidade e experiencia
Máis alá do cinema, Cans segue fiel á súa esencia: a aldea como escenario vivo. Espazos emblemáticos como o Torreiro ou o Jalpón de Aurora volverán ser puntos clave da programación, que incorpora ademais o Día das Novísimas (20 de maio), dedicado a cineastas menores de 25 anos.
Esa xornada culminará coa tradicional Noite dos Veciños, onde se estreará a peza colectiva Non me movas os marcos, coa participación de máis de 40 persoas da aldea. O festival tamén renderá homenaxe ao actor Celso Bugallo, cunha Rúa Efémera e unha retrospectiva dos seus curtametraxes, en lembranza dunha figura moi vinculada ao certame.
A música como guinda do pastel
A música volverá ser parte esencial do festival, con 25 actuacións de estilos diversos que dialogan coas proxeccións e actividades paralelas. Entre os nomes confirmados están De Ninghures, Nat Simons, Aurora Beltrán, Arizona Baby, Alana, Laura LaMontagne ou The Homens, ademais da Noite Lasal de videoclips, cun xurado formado por Pablo Novoa, Antía Ameixeiras e o cineasta portugués Paulo Pinto.
Con 23 edicións ás súas costas, Cans non só se mantén, senón que medra sen perder a súa esencia. Un lugar onde o cinema baixa do pedestal, a música se coela polas rúas e a cultura se vive a ras de terra. E quizais aí estea o seu maior segredo: facer grande o pequeno sen que deixe de selo.
