A reorganización do Concello de Lugo tras a chegada do novo goberno do Partido Popular reactivou o debate sobre as políticas lingüísticas na administración local cando varias entidades sociais e a propia opoisición daban conta da eliminación da área específica de Promoción da Lingua Galega.
Dende o propio goberno municipal negan que este area se eliminara, mentres defenden unha reforma da estrutura de funcionamento, argumentando que a lingua debe estar presente de maneira “transversal” na acción de goberno.
BNG e PSdeG, en contra da nova medida municipal
Desde a oposición, a portavoz nacional do BNG, Ana Pontón, criticou a medida ao considerar que debilita o compromiso institucional co galego e pode favorecer a súa perda de presenza no ámbito público. Na mesma liña, o secretario xeral do PSdeG, José Ramón Gómez Besteiro, advertiu de que prescindir dunha concellería específica supón un retroceso nas políticas de normalización lingüística e defendeu que os concellos deben manter estruturas claras para a súa promoción.
Os cruces de acusacións entre partidos na cidade seguen en aumento dende o cambio de goberno tras a polémica moción de censura que apartou ao anterior executivo municipal e levou a Elena Candia a converterse na alcaldesa de Lugo, chegando así o Partido Popular 27 anos despois ao goberno.
O Partido Popular nega a súa eliminación
Pola súa banda, o goberno local de Lugo negou que se teña eliminado a promoción da lingua galega. Segundo o consistorio, levouse a cabo unha reorganización interna do organigrama municipal que non implica a desaparición destas políticas, senón a súa integración nun modelo de traballo transversal.
O executivo local defende que esta fórmula non reduce a importancia do galego, senón que busca “reforzar a súa presenza en todas as áreas municipais”, evitando que quede limitada a un único departamento. Neste sentido, argumenta que a lingua debe estar presente de maneira “transversal” na acción de goberno, desde a cultura ata a educación, a comunicación institucional ou os servizos públicos, en lugar de concentrarse nunha única concellería.
O Concello insiste ademais en que mantén o seu “compromiso institucional firme” coa promoción e defensa do galego, e rexeita as acusacións de eliminación da área como “incorrectas” ou “descontextualizadas”. Ademais, dostén que a nova estrutura non supón unha redución de políticas lingüísticas, senón unha forma distinta de xestionalas, orientada —segundo a súa versión— a darlles maior alcance e coordinación dentro do conxunto da administración local.
