Antes de converterse nun destino turístico de prestixio internacional, a Ribeira Sacra foi unha terra moldeada polos seus ríos. O Miño e o Sil configuraron ao longo dos séculos unha paisaxe única, marcada pola presenza dos mosteiros, pola viticultura heroica e por unha relación íntima entre a natureza e a actividade humana. Hoxe, eses mesmos ríos continúan sendo a mellor porta de entrada para descubrir a esencia desta comarca a través das rutas fluviais da Deputación de Lugo.
O que comezou hai máis de dúas décadas como unha aposta pioneira da institución provincial para poñer en valor os recursos naturais, paisaxísticos e patrimoniais da Ribeira Sacra transformouse nun dos grandes referentes turísticos da provincia e de Galicia. Moito antes de que a comarca acadase o recoñecemento do que goza hoxe e antes de que a súa candidatura a Patrimonio da Humanidade ocupase un lugar destacado na escena internacional, a Deputación xa impulsaba unha maneira diferente de coñecer este territorio: desde a perspectiva privilexiada dos seus ríos.
Ao longo destes anos, as rutas fluviais contribuíron de forma decisiva a divulgar a riqueza paisaxística, cultural e patrimonial da Ribeira Sacra entre milleiros de visitantes. Cada tempada, decenas de miles de persoas embarcan nos catamaráns da Deputación para contemplar desde a auga unha paisaxe que impresiona pola espectacularidade dos seus canóns, polos viñedos en socalcos que desafían a pendente e pola harmonía entre o medio natural e a intervención humana que caracteriza esta comarca.
Navegar polo Miño e polo Sil permite descubrir a Ribeira Sacra desde unha perspectiva difícil de igualar. Desde a cuberta dun catamarán, os visitantes poden admirar os profundos canóns escavados polos ríos durante millóns de anos, achegarse aos viñedos que se sosteñen en ladeiras imposibles e coñecer os mosteiros e elementos patrimoniais que axudan a entender a historia e a identidade dun territorio cun carácter singular.
O éxito desta proposta reflíctese tamén nas cifras. Só durante a pasada Semana Santa, máis de 2.400 persoas participaron nas rutas operadas pola Deputación de Lugo, un dato que confirma o atractivo dunha experiencia que segue sumando visitantes ano tras ano. Ao longo da tempada, que se estende entre marzo e decembro, son xa máis de 60.000 as persoas que elixen navegar polos ríos Miño e Sil para descubrir unha das paisaxes máis extraordinarias de Europa.
Reserva a túa viaxe
Na actualidade, a institución provincial opera tres embarcacións que percorren dous dos espazos máis emblemáticos da Ribeira Sacra. Desde Ponte do Sil parten o catamarán Mencía e o monocasco Canón do Sil, que permiten descubrir unha das estampas máis recoñecibles de Galicia. Pola súa banda, desde Belesar sae o catamarán Pelegrín, que realiza a ruta de Cabo do Mundo e ofrece aos visitantes a oportunidade de contemplar desde o río un dos meandros máis coñecidos e fotografados da provincia. Dúas propostas complementarias para achegarse á diversidade paisaxística e patrimonial dun territorio único.
As persoas interesadas en realizar algunha destas rutas poden consultar horarios, itinerarios e adquirir os seus billetes a través de www.rutasembalses.es. Para obter máis información, tamén está dispoñible o servizo de reservas no teléfono 982 26 01 96.
