O Real Club Deportivo de la Coruña vén de tomar unha importante decisión con respecto a súa identidade: mudar de nome. O equipo coruñés ofrecerá a posibilidade -ata o próximo 21 de xuño- aos seus afecionados de decidir cal será a nova designación. Os deportivistas terán a oportunidade de escoller entre: Real Club Deportivo de La Coruña, Real Club Deportivo de A Coruña ou Real Club Deportivo da Coruña.
Os socios, claves no nome do club
O proceso está reservado exclusivamente aos socios maiores de 12 anos e pretende permitir que a afeción se pronuncie sobre a designación do equipo. A través da súa páxina web, os usuarios poderán acceder á consulta mediante a identificación coa súa conta do Dépor ou co ID de Abono.
📲 Segue os pasos para participar no proceso de consulta sobre a denominación oficial do Club
— RC Deportivo (@RCDeportivo) June 17, 2026
👉 https://t.co/qNGMXTjD7B
⌚ Ata as 18:00h do 21 de xuño
👀 Exclusivo para persoas abonadas do Club. pic.twitter.com/CUmjyplwLV
Cada socio poderá votar unha soa vez por unha das siguientes opcións: manter a denominación actual: Real Club Deportivo de La Coruña, adecuar o nombre do Clube á toponimia oficial da cidade -adoptando a denominación «Real Club Deportivo de A Coruña» en castelán– e «Real Club Deportivo da Coruña», en galego.
Os maiores de 65 anos e as personas con diversidade funcional poderán exercer o seu dereito a voto por vía telefónica ata o venres 19 ás 21:00 horas. O resultado terá carácter vinculante e a adecuación producirase no caso de que a opción B obteña a maioría simple dos votos emitidos. Ante isto, os órganos do Clube levarán a cabo as xestións necesarias para que a nova denominación se implemente na temporada deportiva 2026/2027.
Unha campaña escolar que sempre foi máis alá
A iniciativa parte da campaña #ODeporéDaCoruña, impulsada pola mocidade do IES Rafael Dieste dentro do proxecto #Aquítaménsefala, que leva un ano mobilizando apoio social e cultural. A acción foi acompañada de concertos, actividades nas rúas e a distribución de miles de adhesivos, acadando unha notable repercusión na cidade.
O cambio será o primeiro no nome do club en máis de 85 anos. A última modificación relevante produciuse en 1941, cando se recuperou a denominación de Real Club Deportivo de la Coruña tras a etapa da Segunda República. Agora, o club prepárase para unha nova etapa na que o nome oficial poderá reflectir o uso do topónimo galego, nun momento clave da súa historia.
