A Agrupación Instrutiva de Caamouco, dentro da súa programación de verán, organiza unha nova edición do ‘Descubre con nós o Porto de Redes’. A actividade está prevista para este vindeiro sábado 13 de agosto de agosto ás 19:00 horas. As inscricións hai que tramitalas no teléfono 676 72 52 01. Nesta nova edición e como vén sendo habitual, Ernesto López Naveiras será o encargado de liderar o percorrido polas rúas e prazas de Redes.
Trátase dunha ruta coa que a Agrupación Instrutiva quere poñer en valor o rico e variado patrimonio natural e arquitectónico da localidade, sen perder de vista o seu legado mariñeiro. Enfocado tanto para veciños como para visitantes, o ‘Descubre con nós o Porto de Redes’ permite achegar os participantes ata aqueles recantos mais ocultos da localidade.
‘O percorrido é tamén unha viaxe no tempo, ata historias do pasado que estaban a piques de caer no esquecemento e que nos axudan a explicar como era a vida neste Porto antes e como é agora’, indica Dani García, presidente da Agrupación. Recupérase a normalidade.
A edición deste ano do ‘Descubre con nós o Porto de Redes’ recupera a normalidade ao 100%. O ano pasado, a proposta tivo que adaptarse ás restricións vixentes naquel momento. No 2020, a iniciativa transformárase nun documental. Unha peza de 22 minutos de duración, na que se facía un percorrido polo patrimonio material e histórico da localidade e que aínda se pode consultar na canle de Youtube da Agrupación Instrutiva de Caamouco.
