Esta pasada fin de semana retomouse en Foz a celebración do Festival Vrao e o Concello fai un balance moi positivo do evento: “a cita foi un éxito de público e de boa música”.
Dende a Delegación de Cultura móstranse “moi satisfeitos de apostar por este festival. Un formato pequeno, de música independente e galega que encheu de bo rollo a praza Conde de Fontao”, sinala a concelleira de Cultura, Inés López Couto, quen engadiu que as festas de San Lourenzo tiveron continuidade na fin de semana con este evento que pensaron como unha alternativa para a xente de Foz.
No evento tamén participou o CB Celtas de Foz, poñendo o seu traballo e esforzo na venta de bebidas e do que destinarán a recadación ás súas categorías inferiores.
“Esperamos que esta sexa a volta da música galega e independente a Foz, en formato festival. Ofrecendo a mellor opción a afeccionados á música de diferentes estilos, Vrao para artistas alternativos, Festival Bal y Gay para música clásica, banda de música e outras asociacións de Foz para os artistas locais e orquestras para aqueles fans da verbena«, rematou a edil de Cultura.
