O Concello de Pontedeume informa dos datos de atención a peregrinos e visitantes correspondentes á tempada de verán na oficina de turismo da vila. Dunha banda, dende o inicio da tempada de verán, as concellerías de Turismo e Deportes coordinaron a recepción e asistencia a grupos de peregrinos organizados que solicitaron pernoctar no Pavillón Municipal de Deportes. Os grupos procedían de Hungría, Italia, Valencia, La Rioja, Aragón, Asturias, Madrid, Cataluña e Castilla-La Mancha.
Ademais, facilitouse apoio loxístico a entidades como a Asociación Española Contra o Cancro, Greenpeace e marchas ecoturistas ao seu paso pola vila eumesa realizando o Camiño Inglés. En total, 1.330 persoas pertencentes a este tipo de entidades pernoctaron no Pavillón Municipal de Deportes desde o mes de xuño. Esta cifra súmase aos máis de 5.600 peregrinos atendidos ata día de hoxe na Oficina de Turismo, dos que 3.100 fixeron uso do albergue municipal.
Doutra banda, a análise realizada nestes últimos días reflicte que durante este ano 2022, máis de 19.000 usuarios foron atendidos na Oficina de Turismo. Destaca especialmente nestes meses de verán a recepción de cruceristas, campamentos e visitas organizadas. Por último, o Castelo de Andrade recibiu 3.549 visitas desde a súa apertura o pasado 1 de xullo. Neste sentido, o Concello de Pontedeume recorda que o lugar estará aberto ao público ata o vindeiro 15 de setembro.
