O Concello de Vimianzo continúa exportando o potencial da súa riqueza material e inmaterial no 7º Encontro Internacional #EuSAVE denominado ‘Foro internacional sobre a sustentabilidade social e o patrimonio cultural das zonas rurais’ que se está desenvolvendo estes días na cidade búlgara de Berylovo. O obxectivo prioritario desta edición é a creación de innovadoras estratexias de desenvolvemento conxunto para vilas históricas, intelixentes e sustentables da Unión Europea.
Desde este martes 30 de agosto e ata o sábado 3 de setembro, representantes de varios países europeos como España, Italia, Croacia, Bélxica, Portugal, Bulgaria, Letonia e Macedonia poñerán sobre a mesa as fortaleza e puntos a mellorar das diferente vilas históricas que os integran.
O Concello de Vimianzo, que lidera o proxecto europeo #EuSAVE – Citizens’ action for Smart Historic Villages, onde participan 40 municipios rurais de menos de 10.000 habitantes, está representado pola Axente de Desenvolvemento Local, Rosa Sánchez.
A súa función primordial será trasladar todo o potencial cultural, paisaxístico, social e económico do municipio para seguir buscando novas formas de crecemento a nivel local e europeo. Tamén será a encargada de recoller os plans de actuación doutros lugares para poder ver se terían cabida en Vimianzo e seguir poñendo en valor todo a súa riqueza.
Desde o goberno local sinalan que este novo encontro é “unha oportunidade máis para dar a coñecer o noso e para seguir medrando da man con outras vilas históricas da Unión Europea, coidando a comunicacións con outros compañeiros e compañeiras que, a pesar da distancia, comparten os nosos problemas e tamén as nosas oportunidades”.
O propósito global da iniciativa #EuSAVE – Citizens’ action for Smart Historic Villages é crear unha rede de vilas históricas europeas onde a súa cidadanía participe e se implique en diferentes iniciativas que fomenten a vida socioeconómica da localidade e que promovan accións de compromiso social definindo estratexias de desenvolvemento local baseadas nas oportunidades que ofrece o patrimonio cultural material e inmaterial deses territorios históricos como activos para o crecemento rural intelixente, sustentable e inclusivo da UE
