A xogadora samoana Dynn Leaupepe continuará a próxima tempada no BAXI Ferrol despois de aceptar a oferta de renovación que lle presentou o conxunto departamental. A xogadora de 24 anos e 1.79 metros mantense ás ordes de Lino López e tratará de axudar ao equipo para conseguir o obxectivo de ascender á liga Endesa.
Na pasada campaña, a xogadora disputou vinte encontros co equipo ferrolán conntando con algo máis de quince minutos de medía e 6,7 puntos. A xogadora destaca sobre a súa continuidade no equipo departamental o gran potencial que teñen para ser capaces de ascender á liga superior, afirmando que «é o obxectivo e a aspiración de todos e todas as grandes persoas que coñecín, non só na cancha senón tamén fóra de ela».
En canto ao que pode seguir achegando ao conxunto ferrolán a samoana destaca a súa enerxía positiva tanto dentro como fora da pista, así como as súas incontables ganas de que este vindeiro ano sexa moi exitoso para o BAXI Ferrol.
Dynn Leaupepe convértese na oitava integrante do persoal ferrolán para a próxima tempada, tras as renovacións de Patri Cabrera, Natalia Rodríguez, Sune Swart, Patricia Benet e Anniina Aijanen e as fichaxes da valenciana Irene Garí, da arxentina Andrea Boquete e da canaria Laura Fernández.
