O grupo municipal do Partido Popular volveu manifestar onte a súa preocupación pola «situación de abandono na que se atopan os areais da cidade». Os de Rey Varela denunciaron que hai un mes que comezou a tempada de praias «e moitos dos nosos areais seguen tendo graves deficiencias en servizos que sofren os bañistas”.
O edil popular Alejandro Padilla acusou ao goberno local de «chegar tarde» ao mantemento das instalacións e criticou que a pesar de investir máis de 50.000 euros «o estado das praias segue sendo moi deficitario”. Según o PP de Ferrol a isto súmase a falta de accesibilidade ás praias privando ás persoas con diversas discapacidades de poder gozar das mesmas. “O alcalde leva un ano sen aprobar a Ordenanza de accesibilidade a pesar de que hai un acordo plenario votado por unanimidade onde se instaba a sometela a aprobación”, lembraron.
Deficiencias
Desde o Partido Popular fixeron unha listaxe das prinicipais deficiencias que se atopan actualmente nas praias e apuntaron que «en Ponzos seguimos cun acceso de cemento que non chega á area, os bañistas que van a Santa Comba e a Penencia teñen que sortear as fochancas do aparcamento e os aseos non teñen desinfectantes”.
Tamén apuntaron que «na praia de Caranza os usuarios seguen tombados entre a area e a herba pola falta de limpeza, unha situación que se repite na zona arborizada con mobiliario urbano roto, duchas sen lousas. Tamén apuntaron que na Graña as pasarenas seguen sen chegar á auga impedindo ás persoas de mobilidade reducida poder darse un baño e as fontes están mal precintadas.
“Solicitamos unha vez máis ao goberno local, igual que facemos nas comisións, que cumpra cos traballos de mantemento e limpeza nos areais”, os ferroláns e os turistas merécense gozar das praias, concluíron os populares.
