A CIG concentrouse este mércores nas sete cidades galegas en rexeitamento ao segundo acordo asinado polo Goberno español, a patronal, CCOO e UGT para a prórroga dos ERTE. Dende o sindicato de traballadores advirten que é unha situación insoportable alargar esta prórroga mentres seguen en vigor as reformas laborais, das pensións e da negociación colectiva ou os recortes nas prestacións por desemprego e os servizos públicos. «Supón afondar no abuso patronal e un enorme prexuízo para o conxunto dos traballadores e das traballadoras», afirman desde a organización.
A CIG anunciaba nestas concentracións que tras a crise sanitaria agora toca superar unha económica e social, a cal vai provocar que os ERTE pasen a ser despedimentos. Así mesmo, aseguran que as persoas despedidas dende o 14 de marzo siguen no desemprego e consumindo o paro, o que provoca unha desprotección e un empobrecemento de amplos sectores da poboación.
Os traballadores desamparados
A este respecto, a CIG asegurou que a partir do día 18 de xullo a prestación por desemprego que se percibe baixa do 70% a tan só o 50% da base reguladora, supoñendo un duro golpe para os ingresos dos fogares. Esta foi unha reforma nas prestacións que impuxo o PP en 2012 e que a día de hoxe tamén segue en vigor. Dende a sindicato de traballadores consideran lamentable que tanto UGT como CCOO contribúan a construír esta realidade nun momento económico e social tan duro.
Ademais, poñendo o foco na actual situación da comunidade galega, afirman que estas medidas non permiten unha recuperación económica xusta e non resolven os problemas da crise industrial e social que xa viña padecendo Galiza, ameazada a día de hoxe por peches de actividades produtivas e despedimentos masivos.
