O Concello de Valdoviño e a Asociación organizadora da Baixada de Carrilanas a San Mamede traballan conxuntamente na declaración da cita como Festa de Interese Turístico de Galicia por parte da Xunta. Con ese obxectivo, que ampliaría significativamente a promoción e divulgación da festa e facilitaría o seu acceso a novas liñas de axudas, administración e entidade iniciaron o expediente, que implica un arduo traballo de recopilación de información e documentación gráfica.
Un documento que deberá pasar o filtro do pleno municipal antes da súa remisión á Xunta de Galicia, administración competente para determinar a declaración. Sen présa pero sen pausa, o Concello leva dous meses traballando na recollida de información, que se complementará agora coa da Asociación, e a intención é concluír a tramitación o próximo mes, para así chegar a agosto cos deberes feitos e a declaración aprobada.
De cumprirse o calendario marcado, a Baixada celebraría así o seu 25 aniversario co recoñecemento autonómico. Unha distinción sobre o papel a unha cita festiva única en Galicia e referente en toda España que cada ano congrega a milleiros de persoas, e que supón un escaparate privilexiado de promoción turística para Valdoviño.
