O traballo realizado a tempada pasada por Adri non pasou desapercibido, ao recibir o xogador ferrolán o Trofeo á Mellor á da LNFS, outorgado de maneira ex aequo co xogador do Barça, Adolfo. Esta é a primeira vez que hai un empate na votación realizada entre os capitáns e adestradores da Primeira División.
Tamén a nivel individual é a primeira vez que o xogador ferrolán é recoñecido como mellor á da LNFS, tomando a substitución de Sergio Lozano, mellor á na tempada 2019-2020.
Previamente ambos os xogadores, ademais do xogador do Viña Albali Valdepeñas, Chino, foran seleccionados polos afeccionados como os tres mellores, tras unha votación realizada na páxina web da LNFS.
A LNFS destacou que «o mellor Adri saíu á luz o presente curso 2020-2021. Os anos non parecen pesarlle a un xogador que xornada tras xornada mostrou a súa mellor versión sobre a pista azul da liga Nacional de Fútbol sala. O internacional absoluto con España foi fundamental nos esquemas de Héctor Souto acumulando case a totalidade dos minutos sobre a pista nos 23 partidos disputados na liga cunha bagaxe de 16 goles.”
