O campo da festa de San Bartolo será escenario este domingo, 23 de agosto, a partir das 19.00 horas do espectáculo Saaabor!, a cargo da compañía Culturactiva S. Coop Galega. Unha función que lles fixo merecedores do Premio do público Festiclown 2018. As invitacións para asistir ao espectáculo poden retirarse ata o mércores na Oficina Municipal de Turismo, situada na Porta do Sol, de 11.00 a 17.00 horas, e o xoves de 11.00 a 14.00 horas. Así mesmo, dende o departamento de Cultura lémbrase do uso obrigatorio da mascarilla durante a actividade.
Culturactiva presenta a Félix Rodríguez e Fran Rei en Saaabor!, unha proposta para todos os públicos, de creación propia e dirixida por Avelino González.
Saaabor! é un espectáculo cómico que mestura música, maxia, humor, ritmo e participación do público, co mundo da gastronomía de fondo. Os nosos protagonistas convértense en dous recoñecidos chefs que nos ofrecen pratos para todos os gustos: desde a comida máis práctica e sinxela ata a máis elaborada, sen esquecer o viño e a sobremesa, elaborando un saboroso menú para toda a familia.
