O goberno municipal de Narón quere manifestar públicamente o seu apoio ao manifesto da Confederación de Anpas Galegas sobre o próximo inicio do curso 2020-2021. Dende o colectivo alertouse da fonda preocupación das familias galegas pola situación sanitaria, asistencial e educativa que se presenta de cara á volta ás aulas, incidindo en que existe unha mala organización e, polo tanto, solicitan a implantación dunha serie de medidas que permitan garantir a seguridade do alumnado.
Normas para manter a seguridade nas aulas
Un plan de acollida emocional ao alumnado, reorganización dos currículos das materias do vindeiro curso, contratación de persoal de enfermería e educadores sociais en todos os centros, mantemento sistemático da distancia de seguridade cos espazos, profesorado e persoal de apoio necesario, posibilidade de non asistir á clase do alumnado en situación de risco sanitario ou que conviva con persoas nesa situación e garantía de detectar e atender as fendas dixitais son, a maiores da limpeza e hixiene dos centros educativos e servizo de transporte escolar, algunhas das medidas que require a Confederación de Anpas Galegas.
Unhas medidas que debe asumir a administración da que dependen as competencias educativas, neste caso a Xunta de Galicia. Dende o concello de Narón quixeron lembrar o pleno celebrado o pasado mes de xullo, onde se aprobara unha moción presentada polo bipartito TEGA e PSOE, instando á Xunta a elaborar un protocolo consensuado cos representantes da comunidade educativa para garantir a seguridade na volta ás aulas ante a crise da Covid-19 e no que se incluísen varias medidas encamiñadas a ese fin.
