A Xunta de Goberno Local acordou esta mañá do luns 24 de agosto aprobar as memorias-programa requeridas polo Instituto Galego de Vivenda e Solo -IGVS- no marco do Programa de fomento da rexeneración e renovación urbana e rural do Plan Estatal de Vivenda 2018-2021, na anualidade 2020.
Logo de que a semana pasada o IGVS lle notificara ao Concello o financiamento máximo que lle foi concedido, a Administación local ferrolá vaille remitir en breve ao organismo da Xunta de Galicia toda a documentación requirida para optar a el. Trátase dunha cantidade «moi inferior á solicitada», explicou o voceiro do goberno local, Julián Reina, na súa comparecencia posterior á reunión do equipo de goberno. Pese a elo, o Concello quere darlle un novo impulso ao traballo de rehabilitación e mostrar o seu compromiso coa recuperación de vivendas, xa que Ferrol é «unha das cidades galegas que máis rehabilita», lembrou o edil.
Orzamento dirixido só á área Ferrol Vello-A Magdalena
Para continuar este programa, Ferrol vai dispoñer de 275.000 euros que aportará o Ministerio de Transportes, Mobilidade e Axenda Urbana e 57.750 que achegará a Xunta. Segundo explicou Reina, esas cantidades vanse dedicar integramente a unha das catro áreas de rehabilitación que ten a cidade: Ferrol Vello-A Magdalena.
O motivo é que as subvencións en marcha na Graña e en Esteiro Vello aínda non se consumiron, mentres que o Concello está a destinar unha importante cantidade de fondos propios á recuperación de Recimil. Trátase de centrar a acción e os esforzos nunha zona na que o Concello detectou unha especial demanda.
